唔少市民趁五一黃金周「懲罰」黃店，振興黃色經濟圈，之前多次力撐社運嘅李綺雯，離開CCTVB之後，可以更自由參與，好似噚日佢就去咗黃店膳心小館擔任一日店長，佢嘅拍檔唔係藝人，而係公民黨主席梁家傑，二人拍住上賣曲奇、蛋卷。
傑哥︰藍店搞唔起怪邊個
李綺雯同傑哥噚日去膳心小館幫手義賣，傑哥仲學識點用收銀機幫手收錢，佢話閒時都會睇黃店地圖、和你Eat，仲話𠵱家更加要撐黃圈，因為睇吓西環主任駱惠寧、保皇黨同親共派咁緊張打黃色經濟圈，就知成件事方向正確啦！對於西環話黃圈係政治綁架經濟，傑哥話大陸一早就玩政治綁架經濟！睇吓何韻詩、黃耀明全部斷晒內地市場，咁呢個係乜嘢呀？即係大陸做得，香港人就唔做得，好奇怪囉！佢仲話建制派支持者都可幫襯藍店，只係佢哋搞唔起，怪得邊個？
至於李綺雯體會都相當深，她舊年10月已被CCTVB雪藏，坦言經濟方面不太受影響，舊年力撐反送中運動，𠵱家都會光顧黃店，最近佢籌備自己嘅YouTube頻道，之前做咗「Stay home with me 14 Days」嘅直播，網民話睇佢拍片煮嘢食好治癒，令佢覺得呢個方向拍片應該有得搞，其實𠵱家大把網上平台，唔做CCTVB都大把平台出片！
李八方