作為保皇陣營首席鍵盤戰士、又係國家領導人嘅前特首梁振英，呢排唔知受咗乜嘢刺激，fb出po令人笑到碌地，繼之前將歌手黎瑞恩變做黎智英個仔，噚晚佢又忽然將「公民提名 必不可少」呢條數、坐時光機算到去《三國演義》作者羅貫中頭上，話呢個元朝人唔尊重600年後先出現嘅《基本法》。
又吹歪風 籲「裝修」黃店
689噚晚出po，原本插有意再參選嘅羅冠聰冇尊重《基本法》，但寫咗句「佔中期間，羅貫中的主張是『公民提名 必不可少』，但基本法白紙黑字的規定是『提名委員會提名後普選產生』」，雖然羅貫中本《三國演義》明顯違背「一中」原則，但成本《三國》冇寫過「公民提名 必不可少」，元朝更加未有《基本法》，羅貫中點尊重？不過689好快將羅貫中改返羅冠聰，唔知算唔算平反？
除咗呢單，689又喺fb出po，批評黃店冇譴責示威者「裝修」藍店，於是佢鼓勵市民「依法」裝修黃店，呼籲人去政府舉報違反法規嘅黃店，點知班連登仔睇到，即刻話有689吹雞，快快跟689「指示」去「依法」裝修藍店，仲即時有人提出幫邊啲藍店「依法」大裝修，如果有藍店因為咁要用筆錢去搞「依法」裝修，呢筆損失係咪689負責呢？