本欄不久前講過，經濟壞，股市升，數據差，指數好。四月份香港股市升咗一千點（1040點），但匯豐首季稅前盈利跌48%，三桶油（中石油、中海油、中石化）因油價大跌，首季業務盈轉虧，美國首季GDP跌4.8%，中國GDP首季跌6.8%，香港GDP預測愈來愈壞，陳茂波講到會跌7%咁多（最差估計）！唔好玩啦，杜瓊斯指數由4月1日之2,0943點升至4月30日之2,4345點，升足16%以上。
一位分析師老友叫左丁山唔好咁老一套，要追上時代，佢話：「成日睇住壞經濟數據，就話股市唔掂，呢個觀點，好80年代嘞，21世紀流行講QE，講政府刺激方案，講中國人大政協兩會開會就有利股市，揀股票比較難啲，但買指數升跌，緊貼頭條新聞就冇乜走雞。嗱，今年五月北京開兩會，特朗普要五月重開美國讓市民上街。這兩大新聞足以支持恒指杜指繼續上升嘅嘞，你睇莎莎股價急彈，就知道股市期望五月後有消費V彈嘅啦！」
左丁山在大學副修財務，啟蒙課本係Benjamin Graham之Security Analysis（與David Dodd合著），學「價值投資」（Value Investing）概念，到咗1980年代，初次操盤，又受當時世界上最成功嘅基金經理Peter Lynch嘅影響，invest in what you know，投資觀念當然係比較保守，對唔怕輸（因有央行救市），炒概念，炒政策嘅21世紀投資方法，真係追唔上。
之不過仍然要拗頸，即使目前疫情受控，可以清除病毒，有神效藥物面世，一兩年之內，世界性消費，中國講內需是否會V形反彈（即是講積存消費力大爆發，例如旅遊）？左丁山就認為唔會嘞，先講消費力，如老友碌曾所言，香港除咗30萬名公職人員（公務員及政府支持機構僱員），有薪高糧準福利之外，所有勞工現在都受減薪、無薪假期，佣金大減，貼士變零之苦，要積極地節宿開支。推展到全世界，IMF指出，全球估計已有幾千萬人失業（單係美國已有3,000萬），經此一疫，即使6月份冇晒疫情，全世界打工仔是否真係膽敢拚命消費，爭搭飛機旅行住酒店或者大買時裝首飾？左丁山認為正常人一定會改變過往經濟行為，以後使少啲，儲蓄多啲。疫情過後，中國、香港也許消費會正常回升，逐漸回復到2019年水平，但幾難有高增長（與2019年水平比較），換句話說，左丁山唔信有消費V形反彈。股市繼續炒概念炒政策啫，不理會實際，總之係適者生存。