本身湊咗個「好」字嘅利物浦中場韋拿杜姆，日前喺ig話女友Virginia啱啱誕下佢哋嘅第三個愛情結晶品：「我哋嘅囝囝喺2020年4月28日出咗世喇，我哋好開心呀！仲幫佢改咗名叫Julian Emiliom。」唔少紅軍球員都留咗言恭喜呢位荷蘭國腳。利物浦今季喺英超一枝獨秀，韋拿杜姆亦係紅軍重要一員，呢個夏天佢除咗要照顧三個小朋友，仲要抽時間考慮自己嘅前途，因為佢喺2021年6月就約滿紅軍，講到續約佢話：「暫時好難講，要視乎球會嘅意向，同埋合約屆滿嗰陣嘅情況。晏菲路就好似我屋企咁，所以目前只會專注喺今季，希望有一個好結局喇。」受疫情影響英超已全面暫停，利物浦目前以29戰得82分拋離少踢１場嘅隊曼城25分，只要再攞六分就坐定粒六捧走英超冠軍。