今年的五一黃金周，多個民間團體呼籲香港人參與「黃金周支援黃店計劃」，齊齊「懲罰」黃店。不少藝人的黃店也加入了計劃，吳日言（Yan）與袁彌明昨日落舖坐鎮，莊端兒就與邵仲衡到牛頭角一家餐廳客串做店長義賣，未開賣就吸引近半百人排隊。
莊端兒謂近日因為疫情，多數留家中煮食，邵仲衡即笑謂：「咁你煮多啲，下次叫埋我。」記者笑問他不擔心會傳緋聞？他表示與莊端兒是好友：「我哋絕緣，我又唔鍾意喺車尾食蛋糕，呢個（新聞）真係，我睇到都笑咗。」莊端兒直言有潔癖，很少在車廂內進食：「架車有塵㗎嘛，啲cream都會整污糟架車。我唔可以偷食，偷食會俾人知，平日自己一個人食多。」莊端兒又表示平日也會光顧「黃店」，支持黃色經濟圈。
團結港人感動
近日不少藝人陸續復工，邵仲衡透露與張可頤正為ViuTV拍攝新劇：「佢係我哋啲麻甩佬嘅女神嚟，估唔到𠵱家可以生勾勾同佢合作。」問到是否因「限聚令」未有拍攝外景？邵仲衡表示暫時只開工數天，會先完成廠景拍攝：「我知佢哋有少少外景，不過大家分得好開企，同埋揀啲大啲、闊啲嘅地方拍囉。」
吳日言前年與老公Barry開飯糰店，現時有四間舖，昨日兩夫妻送貨到旺角舖兼巡視，現場還有顧客為他們打氣。政治理念清晰明確的Yan表明不想消費「黃圈」：「自己個人立場唔想牽涉到工作範疇，不過大家都好明確知道我哋嘅立場，打開門做生意，我哋乜嘢人都會招待，有本土人支持，見到香港人團結幫返香港人手，好感動！」他們的四間舖中，兩間蝕錢、一間打和、一間停業，他們說：「山頂嘅舖真係冇客，一日只係做幾十蚊生意，已經維持咗兩星期，所以要暫時停業。」
嘆香港好大鑊
袁彌明的生活百貨目前有10間分店，她昨日到觀塘舖坐鎮，她指疫情下生意人流少了3成。她的店舖也有參加「黃金周計劃」，以折扣與現金券優惠予「懲罰」她的客人，袁彌明說：「其實做生意嘅，收乜人錢都冇所謂，但係畀錢一定要畀返啲同路人。」她也坦言自己必定會支持黃店。袁彌明對經濟相當悲觀：「單單美國個幾月已經有3千萬人失業，好多公司欠債，香港都唔會好，真係好大鑊。」她又表示未來會計劃將店舖搬到租金較便宜的地方。
另外，屹立銅鑼灣超過40年的老字號「蛇王二」於上月光榮結業，在開業最後一日，身為街坊的王宗堯和陳嘉莉，特別前往拍攝新節目《遺失．港味》，拍下店舖落下招牌及關閘的一刻。
採訪：栐仁、盧妹
攝影：沈健程、林賓尼