林泳淘說自己是「無業遊民」。這位《東張》女神，宅男們當然忘不了她的緊身白色小背心出擊訪問，但更令網民畀Like，是她敢於為社會發聲的女神真面目。
由呼籲參加反送中遊行，被無綫雪藏到解凍再炒魷，無業大半年，上月開設YouTube頻道吸粉，又開出另一條生路。
生於亂世，自危亦要自救。在畫室的訪問現場，看見一幅幅油畫，有中大圍城、有獅子山下，關心時事的林泳淘，說到政府的疫情處理就忍不了，「我諗明眼人都見到我哋嘅政府，係幾咁有能力！全世界叫佢封關，佢唔去封；當醫護努力付出嘅時候，佢唔肯去聽，𠵱家仲諗住清算醫護，我覺得呢個世界應該得香港係咁！」
還好女神性格是「樂觀過頭」，笑住迎難而上，「我覺得人生唔係淨係得黑白囉，仲有好多唔同顏色！」
今天沒穿上白色小背心的林泳淘，內心一樣黃到金。
撰文：文嘉龍
攝影：周樂恒
人生，你生存到就得
女神轉型YouTuber，原來是Google找她合作，每周開會商討拍攝內容，剪片後期的技術層面，暫時有人待勞，但林泳淘希望自己終有一天可一手一腳包辦。
人人都YouTuber，唔通個個都想做YouTuber咩？女神很貼地，原來最想拍攝的題材，是關於香港的大城小事。「其實香港發生咗好多大大小小嘅事，有好多民生嘢都想去嘗試，自己留意好多露宿者，或者執紙皮嘅婆婆，自己好想去做呢一啲嘢！」如果成事，真正《東張》網上版就是這樣，還用看大台？
疫情當下，自言性格「樂觀過頭」的林泳淘，相信凡事總有得着。「雖然呢一件唔係一件好事，但係我過咗呢一關之後，呢件事令到我學識咗一啲嘢，亦令到我更加成熟！」
被無綫炒魷，又有何得着？「我冇特別去諗冇咗一份工呢一件事，因為人生，我成日覺得你生存到就得㗎啦！呢幾年我都一路諗，我人生最想做啲咩，譬如我自己好鍾意畫畫，我好希望可以開一間畫室，大人又好小朋友又好，你嚟到之後可以感受到平靜同快樂，因為我覺得香港人嘅節奏好快同埋壓力好大！」咁文青，估佢唔到！
林泳淘本名林冬冬，以藝名「林熙」成為樂壇前組合Lacee Lacey成員出道，2012年參選港姐而順利加入TVB入行，去年卻遭「被辭職」。不打無綫工，不是世界末日！「我走，我就已經放低咗，完全冇諗過如果我仲喺公司又點呢？既然已經離開咗，你就要接受呢件事，我接受咗，我𠵱家唯一諗就係我𠵱家可以做啲乜呢？」
我未入行都係嗰啲港女
「𠵱家可以做啲咩？」大概是當下每個香港人撫心自問的問題。林泳淘又如何？除當YouTuber，最近ViuTV的《打天下》亦有份演出，雖然佔戲不多，但原來她和主演的棠哥歐錦棠有段淵源。她曾跟棠哥學戲，而她離開無綫後，第一個找的圈中人求救，正是歐錦棠。
「其實本身係棠哥搵過我，但係我話我𠵱家係TVB約呀！當我完約嗰時，我第一個打畀佢，我話棠哥，我啱啱完咗約呀突然之間，佢就話不如你嚟我個劇度玩啦，我就梗係OK啦！」
都說「識人好過識字」，有棠哥，有劇拍。不過娛樂圈這口飯，大多數時間都處於「等運到」狀態，林泳淘不例外。等運到日子，其實大可日日穿上小背心戰衣或三點式博見報，或在大台無數個山頭中，尋覓大靠山……但她呢？原來走去「報course」。學戲好、日文好，連藝術歷史都讀埋，「基本上我喺公司嘅時候，我一有多餘時間就報course去讀，𠵱家離開咗，我都係第一時間上網去報，之前其實讀緊一啲Art history之類嘅course，個個星期都要寫報告呀！」單是「報course」這回事，本身已很old school。
如果當年不是選港姐，人生道路又是另一番風景，「我諗會好唔同，我諗個性上都會好唔同，因為我覺得我未入行之前，都係嗰啲港女呀，哈哈哈，即係諗嘢都係好幼稚囉，全世界要圍住自己轉，好煩！（有公主病？）係呀，我啱啱入行，我啲同學都成日話，你真係公主病呀！𠵱家慢慢大個咗，尤其入咗行，見到好多人情冷暖之後，你就會覺得其實唔使太執着，人生其實好簡單，你都係想去追求返安穩同埋一啲平靜。」
失業大半年，林泳淘慶幸自己有積蓄，還得家人體諒可以暫時不用給家用，「經濟壓力暫時so far都冇，託賴！（男朋友照顧？）我哋分得好開，我自己有錢就唔需要佢照顧，雖然我成日叫佢快啲養我！我自己都有積蓄，我屋企人知道我𠵱家狀態，我本身每個月都畀一筆錢佢哋，𠵱家佢哋話唔好啦，你有錢先至畀我，所以壓力唔係咁大！」
林泳淘有個圈外初戀男友拍拖至今12年，但原來兩人曾經歷分手再復合才走到現在，「我哋中間分過手，我入咗行之後就分咗手，都分咗一段頗長嘅時間！（有第三者？）唔係，嗰陣有好多唔同嘅嘢發生，你知女仔諗嘢係成熟過男仔20年㗎嘛，大家諗嘢唔同步，好多唔同原因令到分手！（嗰時港女期？）雖然係好港女，但都諗得好遠，哈哈，之後俾佢追返囉！我嘅人生都係圍繞住一個男人，好煩，哈哈！（結婚對象？）暫時都係，除非佢唔娶我啫，佢唔娶我都冇辦法！」
我哋香港人犧牲得太大
身為《東張》女神，林泳淘除了有樣有身材，當然還有顆貼地敢發聲之心，才得網民愛戴。自言只留意時事，不愛看娛樂新聞的林泳淘，不用多說，也肯定同「手足」connect了。「我覺得我做緊呢樣嘢（為社會發聲），係好多人都做緊，唔可以因為我自己嘅睇法，你就覺得我係好高（被神化），我覺得唔係，我覺得係一個好基本嘅事情！」
林泳淘早在去年3月已在網上集氣叫人參與民陣第一次3.31的「反送中」遊行。運動至今，說起最觸動女神的事件，林泳淘眼眶濕了，「我覺得好多時都好觸動我，中大呀理大呀，唉……基本上一開始有二百萬人走出嚟去爭取一啲嘢，你見到香港人嘅團結，所有嘢都好觸動我！香港人付出咗好多好多，可能有好多人覺得大家做咗咁多嘢，好似都冇乜效果，但我覺得我哋身為呢一代嘅香港人，能夠一齊去經歷呢件事，最終無論結果係點，我哋呢班人嘅想法係唔會改變，我依然會堅信我哋會有一個好嘅結果！」
「樂觀過頭」的女神，正能量又出來了。「我唔會覺得係絕望，尤其係年輕人，我好希望大家可以喺裏面再學習一啲嘢，希望我哋以後條路，大家可以行得更加好，而犧牲可以越來越少囉，我覺得我哋香港人犧牲得太大啦！你諗吓幾恐怖，一班年輕人，要佢哋十幾歲嘅時候去經歷呢啲嘢，佢哋去經歷呢啲嘢嘅時候，亦都未得到佢哋想要得到嘅嘢，所以我覺得佢哋付出得太多太多，而當大家都付出得咁多，你點可以覺得絕望或者放棄呢？唔可能！我希望大家藉住咁多事情嘅時候，大家都去進步，千祈唔好熄囉呢一團火！雖然𠵱家係疫症，大家可能有其他嘢要顧，但唔好忘記之前大家付出嘅所有嘢！」
望見林泳淘忍着眼淚說出來的一番話，怎能不動容？但說着說着，她又說：「唔好咁煽情呀！」又怕自己說多了。不用怕，人話不怕多說，但她強調：「我唔係咁叻嘅人，我唔可以代表晒所有人去講，我只係純粹自己嘅睇法！我覺得所有事情，都好需要智慧。我可能好嬲，我可以做到啲乜呢？其實𠵱家經歷咗咁多個月啦，大家都會見到有啲國際文宣，得到嘅力量係更加好，既然𠵱家大家都係home office，可以諗吓其他方面點樣做囉！」兄弟爬山，各自努力，女神要靠腦力！
社運如人生，正如林泳淘人生每一步，也不能預設。「我從來冇諗過自己要爬到去一個乜嘢位，你行到去邊就邊囉！好似啱啱入行之後，《東張》問我入唔入去做，我話好呀，有呢個機會咪去試吓囉，但我身邊有好多朋友都話，哎吔，你唔好去做啦，出去拍劇啦，你唔好嘥咗呢個機會，但係我又覺得冇乜所謂喎，結果我發現原來我入咗《東張》之後，我係好鍾意呢樣嘢，所以人生就係咁樣，你冇話一定要點樣！」
生於亂世，人生更難測。
後記：高尚情操
自細對畫畫甚有興趣的林泳淘，身處畫室現場，又自言是「無業遊民」，她不忘對店主開玩笑：「請我入嚟做教畫老師啦！」的確，開店一直也是她心願。
畫室也好、咖啡店也好，「開一間可以俾大家學到嘢之餘，亦可以放鬆到心情，或者身心靈以上都可以有一個抒發，係我自己一路都好想去做嘅嘢！」
遠的暫且不說，不如就問問關心時事又貼地的女神，最近可有令她最嬲的新聞？林泳淘說：「法官嗰單（將軍澳「連儂隧道」斬人案），我都覺得個法官有好『高尚嘅情操』！」
大家都同步嘆了一口氣，一大口怒氣。
場地提供：Paint Palette