踢緊西甲馬德里體育會嘅英格蘭右閘捷比亞，因涉嫌違反賭博條例被英格蘭足總檢控。英足總喺上周五發聲明：「捷比亞涉嫌於2019年7月，違返賭博條例第E8(1)(a)(ii)條、第E8(1)(b)條，被控行為不檢。他需要在5月18日前回應有關指控。」現年29歲嘅捷比亞，舊年7月以約2,000萬鎊（約1.94億港元）身價由熱刺轉投馬體會，英國傳媒就指出可能同呢次轉會有關。前英格蘭國腳史杜歷治曾經被指喺2018年，叫自己阿哥落注賭佢由利物浦轉會西維爾，俾英足總用同樣兩項條例起訴，最終要坐四個月波監。捷比亞回應，話自己從來冇透過足球博彩獲利：「呢幾個月一直有盡力配合足總嘅調查，亦會繼續配合。我要澄清自己作為職業球員，從來冇喺足球博彩落注，亦冇透過其他人落注賭錢。」