話咁快就31歲嘅韋利安，喺嚟緊嘅6月30日就約滿車路士，呢位巴西翼鋒要求一紙三年長約，但據報車仔只肯同佢續兩年，由於傾唔掂數令佢好可能會離開藍戰士。近日就有英媒報道，有多間英超球會有意接收韋利安，當中包括兩支倫敦嘅宿敵阿仙奴同埋熱刺。佢就咁講：「我一直視自己係車路士嘅一分子，我愛我嘅球迷同埋球會嘅每一個人。但如果我同車路士和平分手，加盟一支敵對球隊都唔係問題啩。我同屋企人都好鍾意倫敦，但我真係未決係咪留喺車路士，定係去另一間倫敦球會踢波，亦講唔埋會離開英格蘭。」韋利安又否認教緊熱刺嘅摩連奴曾經向佢接洽，又話之前喺社交網站發佈咗一張全家着住紅色衫嘅相，唔係暗示要去阿仙奴喎，話英格蘭唔似巴西咁唔可以着宿敵嘅顏色衫。