武漢肺炎下，全港多樣經濟活動陷於停擺，昨日趁五一長假期，多個民間團體發起「黃金周支援黃店計劃」，呼籲港人大力懲罰黃店。徐天佑的太太Olive前年以百萬元在尖沙嘴開護膚品店，去年二人因支持反修例社會運動，更加入黃色經濟圈，昨日天佑與太太到舖頭坐鎮，不時都有客人來「懲罰」，但兩層店的SPA區因「禁業令」而空無一人。
SPA區關一個月
天佑向《蘋果》透露疫情下生意嚴峻過社運時期，不過會撐落去，Olive說：「之前成間舖閂門三個星期，SPA區已經一個月冇開，希望7號真係開到，𠵱家零收入。經營係有困難，始終喺尖沙嘴地段，運動時同事都食晒催淚彈，啲人唔敢上嚟，疫情更加唔敢上嚟，所以舖面實有影響，𠵱家未去到蝕錢，但就未賺錢，好彩我哋仲有網上生意，未需要告急咁慘！」店中聘請十多名員工，按摩師要放兩周無薪假，幸好業主也輕微減租，Olive與天佑表示見步行步，亦會互撐對方：「我哋所有嘢都好一致，一齊睇新聞鬧嘅嘢都好一致，意見同價值觀要相似係好緊要，咁先可以一齊生活。」
客人打氣感動
成為黃店，Olive坦言有客人流失：「有流失嘅，亦會有人嚟懲罰我哋。一個生意可以繼續係因為佢嘅產品、品質同埋服務，而唔係你係藍定黃。我哋係一間小店，有好多人支持本土製作。」天佑自言：「 我哋係正面思想嘅人，其實聽到有客人講加油已經夠，呢兩個字好緊要。大家都好需要正能量，睇到香港人咁堅持係好感動，一定會好嘅。」
另外，盧巧音與老公蘇浩才（Sammy）和立法會議員譚文豪現身牛頭角，為一間賣小食的黃店做客席店長，幫手義賣及派防疫包。盧巧音說：「成日喺屋企冇嘢做，不如有錢出錢有力出力，我有問一陣要做啲乜？佢哋話你淨係企喺出面嗌come on baby拉客。」譚文豪透露近日走訪不同黃店幫手，樂見黃店及網店反應熱烈：「希望大家都行出嚟撐黃店，支持黃色經濟圈，從此可以為五一定一個新意義。」
採訪：曹家誠、栐仁
攝影：林賓尼、仇志德