恩莫比尼妻子Jessica日前話，如果老公今季能夠協助拉素贏得意甲冠軍，仲做埋聯賽神射手嘅話，佢會再為恩莫比尼生一個小朋友。Jessica日前喺ig直播訪問，被問到如果老公今季能喺意甲「雙囍臨門」，同時贏聯賽錦標同神射手，會得到咩獎勵時，佢直接回答：「另一個BB。」恩莫比尼夫婦目前已經有三個小朋友，包括長女Giorgia、次女Michela，同埋剛出生冇耐嘅細仔Matteo。意甲家陣正陷停擺困局，拉素目前以26戰得62分，排喺積分榜第二位，一分落後榜首祖雲達斯。至於射手榜方面，恩莫比尼暫以27個意甲入球高踞榜首，拋離21球排第2嘅基斯坦奴朗拿度。