上個月確診咗武漢肺炎嘅祖雲達斯前鋒保羅戴巴拿，雖然早排接受訪問嘅時候提過自己情況已經有好轉，但係近日就傳出第四次檢測結果仲係呈陽性。根據意大利傳媒報道，戴巴拿病毒檢測呈陽性嘅呢個消息之所以流出，原來係佢祖記隊友基斯坦奴朗拿度（C朗）嘅身邊人向傳媒爆料，理由係C朗希望可以用戴巴拿未好番為理由，繼續留喺葡萄牙老家避疫，拒絕歸隊。
戴巴拿女友鬧爆放流料
現年26歲嘅戴巴拿喺3月嘅時候確診武肺，不過家陣已經過咗超過一個月，呢位阿根廷前鋒嘅檢測結果仲係呈陽性，相比起兩位已經好番晒嘅祖記隊友魯加尼同馬度迪，家陣戴巴拿仍然要繼續接受居家隔離。雖然意國政府已經宣佈由下個禮拜一開始，球員可以喺室外進行單獨訓練，所以球員已經可以陸續返去意大利準備開操。
不過C朗眼見戴巴拿仲未好番，就覺得意大利北部嘅疫情仍然未受控，加上自己可以繼續留喺比較安全嘅葡萄牙，等到確保到完全安全之後先再返意國，所以最近非常享受同佐真娜同埋四個仔女一齊，成日放相晒家庭樂嘅C朗，就透過身邊人向意大利傳媒爆料，希望用呢件事作為拒絕歸隊嘅理由。
同戴巴拿一齊中招嘅女友莎芭天妮，喺得知外界公佈戴巴拿第四次檢測結果都係呈陽性之後，喺接受阿根廷傳媒訪問時就鬧爆有人製造假新聞：「我唔知道呢啲消息嘅來源喺邊，因為戴巴拿嘅檢測結果並唔係陽性，佢的確做咗最新嘅測試，但我哋都仲未收到結果，所以我哋要繼續等。另外，我自己喺病毒測試入面已經呈陰性。」
有意大利醫學專家就話，部份感染武肺嘅病人要喺病毒測試由陽性轉陰性係需要一定時間，所以對於目前身體狀況唔錯嘅戴巴拿嚟講，呈陽性反應都只可能係暫時性，所以各位球迷都唔需要太過擔心。
20意甲球會通過望完季
至於同樣喺意甲停擺後返咗家鄉嘅阿根廷前鋒希古恩，家陣繼續留喺屋企陪伴住患癌嘅阿媽。呢排希古恩就為自己母會河床嘅青年軍，舉辦咗一個視像教學，為一班後生仔提供戰術等建議。喺視像教學過程入面，希古恩向河床嘅12至21歲年輕球員傳授自己成年時期嘅經驗，仲喺堂上邊告誡一班後生仔：「唔好拘泥喺一個角色上面，你哋要去創造更多可能性。」另外希古恩仲強調喺場上邊要學識謙虛，同埋點去作出犧牲。最後呢個視像教學持續咗足足粒半鐘，相信一班河床青年軍獲益良多喇。
另外，最新消息話意甲賽會周五召開完電話視像會議，20支球隊全體投票通過會致力完成呢個賽季，主要因為大家都驚攞完電視台嘅轉播費後，唔搞落去會畀電視台告，除非好似法甲同荷甲咁，政府有體育賽事限令，先可以大條道理宣佈腰斬。