喺英超停擺期間，熱刺領隊摩連奴把握呢段空閒時間喺社區做義工，最近除咗親力親為送食材同物資到社區畀受影響嘅家庭之外，仲話自己因為成日留喺屋企，連煎蛋技術都變得好熟練咁話喎。不過，佢最近接受英國天空體育嘅訪問時就話，雖然英超停擺，但係都冇忘記自己本來嘅正職，透露自己好掛住教波，亦希望可以喺不久嘅將來帶領熱刺再度捧起英超冠軍嘅寶座。兩日前就係呢位狂人主帥15年前首季踏足英超之旅嘅日子，摩佬喺第一季執教就即刻帶領車路士喺英超首次封王，但佢似乎就冇留戀過去嘅光輝歲月，喺社交網絡同向傳媒提起，反而再次顯出牙擦好勝嘅本色：「足球係我哋世界嘅一部份，但喺呢個時候必需要保持耐性。我家陣已經有三座英超獎盃喺手，但我鍾意去諗自己會捧走第四座英超冠軍嘅情景。」