《果GYM》教練唔少都係型仔型女，精神奕奕，但其實想有健康嘅身材，佢哋都同普通人一樣要落好多苦功，成功之路都荊棘滿途。今次就介紹健美教練Cathy Luk，大家睇到佢𠵱家樣貌標緻，仲有弗爆身材，但呢一切得來都唔容易。
原來Cathy Luk自細已經受嚴重濕疹困擾，面部、手腳都有嚴重疤痕，不單影響外表，連性格亦變得內向自卑，一直欠缺自信。畢業後任職文職工作，但因為過去醫生建議少做運動，避免出汗令皮膚發炎，加上服用類固醇藥物醫濕疹，令身形暴脹，形成惡性循環，更影響社交生活。
到2013年，Cathy終於立定決心改變，向肥胖及濕疹呢兩個敵人挑戰，包括自學健身，又從飲食入手，完全戒糖和加工食物，多食蔬果，竟然雙管齊下，不單有健美身材，更加連濕疹問題亦喺一年後根治，疤痕亦慢慢減退。找到第二人生，Cathy亦開始以健身為職業，考到健身教練牌，擔任私人教練，亦參加健美比賽，經常獲獎，包括代表香港出戰上年亞錦賽。
