自從上周五韓國職業足球聯賽宣佈，聯賽將會以閉門作賽方式重開，只不過賽程會由38輪減少到得番27輪賽事。自從三月尾之後就冇比賽受注嘅香港足智彩，反應亦都非常快，禮拜三喺「暫定受注球賽」賽程入邊顯示，下個禮拜五、六、日就已經一共有六場韓職賽事可以投注（圖），首場比賽仲要係全北汽車喺主場惡鬥水原藍翼，鍾意賭波或者餓波咗好耐嘅球迷，下個周末絕對唔可以錯過喇！就算韓職重開期間有球員確診武漢肺炎，佢效力嘅球會亦只會暫停比賽14日進行隔離，隨着韓職順利重開，相信足智彩嘅受注球賽將會越嚟越多呢！