相信唔少球迷都仲記得幾年前，我哋嘅香港足球代表隊俾中國話係一支「好有層次」嘅球隊，不過幾年後嘅今日，喺中國隊公佈嘅最新一份集訓名單入面，就破紀錄有三位歸化球員入選，其實如果中國隊選埋其他歸化兵（見附表）嘅話，差唔多有一隊正選都係外國人樣㖭，咪一樣咁有「層次」！
靠中超神射手衝鋒陷陣
雖然世界盃外亞洲區賽事未知幾時可以重開，不過中國足協就已經批准國家隊下個月中喺上海進行集訓。今次嘅27人名單入面，就破紀錄有三位歸化球員入選，分別係廣州恒大嘅艾克森、北京國安嘅英國裔後衞李可，同埋首次入選嘅洛國富。今季先轉投廣州恒大嘅洛國富係一位巴西裔前鋒，出道初期效力過甘美奧、查比高恩斯同聖保羅等幾支巴西知名球隊，2014年開始就喺中超搵食。呢位31歲前鋒近年喺中超嘅表現唔錯，仲曾經喺15年攞咗中超神射手獎，唔知佢第時有冇機會同武磊一齊落場呢？
其實近年歸化中國籍嘅球員有上升趨勢，除咗呢三個之外，挪威混血兒侯永永都喺舊年正式歸化中國，仲成為咗中超首位上陣嘅歸化兵；而曾經效力過愛華頓同代表過英格蘭U21嘅中英混血兒蔣光太，亦喺上年成功歸化。至於廣州恒大都算係出產最多歸化球員嘅中超球隊，除咗現時效力緊嘅蔣光太、洛國富、艾克森同費南多之外，兩位巴西裔球員高拉特同阿蘭，亦都係恒大嘅歸化兵。
恒大蝕20億面不改容
提起恒大，呢支富豪球會啱啱就發表咗新一份財政報告，上年嘅總收入錄得接近9.5億人民幣，不過營運開支就高達29億，埋單淨蝕20億都幾誇張！報告仲話球會嘅最大成本係球員嘅薪金同轉會費，上年簽入艾克森同費南多就用咗接近7,000萬人民幣；而球會回收高拉特所畀嘅肖像權費用，更加接近一億。
不過恒大財力雄厚，普通人又點會理解佢哋嘅使錢方式吖，就好似今個月中因為塗改車牌而被行政拘留15日嘅于漢超咁，原本恒大當時表示會炒咗呢位稅後年薪達1,500萬嘅老將，不過內地傳媒近日就透露，恒大高層下令唔可以清走于漢超嘅個人物品，唔知係咪有情講呢？而于漢超周三獲釋後隨即喺微博貼文公開道歉，面對千幾萬人仔，點都要認低威啦！