「限聚令」已成為Popo最新嘅濫權工具，之前佢哋響太古城中心藉防疫為名打壓香港人合情合法合理嘅抗爭，仲自行僭建同解釋法例，話有共同目的就屬於犯法，令全港市民隨時誤墮法網。不過政府冇糾正Popo不特止，特首林鄭月娥星期二開行會前，仲撲出嚟為Popo解畫護航，但好快有人發現一向吹噓「熟書」嘅777，今次似乎唔多熟書，即場示範佢真係唔識。
777開行會前被記者問到限聚令，佢先大講檢控準則，話要睇法律、睇證據、睇《檢控守則》，但大家就只係睇到一班Popo亂咁嚟。然後777開始舉例，話當日公佈時有人問過好多人一齊排隊、一齊上一架巴士係咪違法，佢就認為大家逐一上巴士、各自返工唔算係「共同目的」，如果一家六口一齊去拜山就係「共同目的」，但有豁免咁話，仲形容條例「寫得十分精準」。
錯指拜山獲豁免
睇到呢度，好多人覺得777似乎答得冇問題，但有人發現，大家一齊坐巴士之所以唔違法，並非好似777咁講一齊坐巴士返工唔算「共同目的」，而係限聚令早已經將呢個情況豁免咗，唔受限聚令管，而政府講明12類獲豁免群組聚集，其中一樣就係「為交通運輸而進行的群組聚集」，講得需要要豁免，咁就梗係因為呢個群眾聚集係違反限聚令囉！至於777話一家六口一齊去拜山有得豁免，八方就搵嚟搵去，只係搵到喪禮同悼念未入土同火化嘅先人先係獲豁免，完全唔係777講嘅拜山，咁睇777真係唔識限聚令，市民聽佢講，恐怕隨時會破財，又畀Popo罰2000蚊。
李八方