朱智賢大前日被《蘋果》踢爆在車廂幽會人夫黎振燁，男方更被目擊不理大肚妻陪女方睇醫生，其間女方更將男友謝東閔降呢為「好朋友」。黎振燁昨日繼續「潛水」，朱智賢則由謝東閔陪同下現身謝罪，謝東閔不單代為求情，更語帶嗚咽，將她偷食的責任孭上身自責。雖然朱智賢合共說了6次「對唔住」，但全程拒向黎太道歉。
現年33歲的朱智賢和現年34歲的人夫黎振燁因拍劇集《食腦喪B》撻着，大前日被《蘋果》獨家踢爆兩人在山邊車廂幽會食蛋糕，女方當時被問到是否和謝東閔分手，她竟黑面發晦氣連續3次不認男友，只稱謝東閔是「好朋友」。《蘋果》也目擊黎振燁捨棄陪孕妻產檢，反而陪朱智賢看醫生。
黎太轉軚唔現身
事件曝光後，朱智賢和黎振燁受盡千夫所指，有指黎振燁原定昨日下午會拖着孕妻步出黃大仙寓所，並齊齊上無綫預先安排的車輛，直駛往電視城拆彈。可是，據知已原諒老公的黎太，最終臨時改變主意不肯現身。朱智賢則在謝東閔陪同下，昨午約4時半在電視城現身見記者。
謝東閔和朱智賢先除下口罩給傳媒影相，謝東閔先發言：「我今日決定企出嚟陪佢開呢個記者會，因為我好擔心佢承唔承受到呢種壓力，佢已經將成件事嘅來龍去脈話咗畀我聽，我亦都知道晒所有嘢，喺現階段……我會陪你走過呢一關，陪你走過呢一關。」此時謝東閔眼濕濕並嗚咽，再望了朱智賢一眼，而女方隨即低頭哭泣。謝東閔續說：「可能一時間佢有啲迷失，不過我覺得自己都有少少責任，可能我成日掛住工作，疏忽咗佢。」他一度望向朱智賢說：「佢係一個好勤力嘅演員，希望大家可以畀機會佢反思吓，嚟緊將來繼續畀心機工作。」此時朱智賢主動跟謝東閔十指緊扣，兩人再來一個深情對望。
接着到雙眼紅腫的朱智賢開腔，謝東閔鬆開她的手叫她坐近咪高峯的位置，她隨即木無表情似背台詞說：「首先我要講嘅係……我要講嘅係對唔住，我令大家失望對唔住……我知自己做錯，我對唔住錫我嘅人，我對唔住畀機會我嘅人，我辜負咗你哋，我辜負咗公司。」說話期間她不時停頓及唞大氣，似乎想「谷眼淚」博同情，但可惜最終失敗。她最後說：「喺呢度，我想同喺呢件事受傷害嘅人講聲對唔住，真心對唔住。」謝東閔再說一句「Thank you」，便搭着朱智賢一同離開，有記者大聲追問：「有冇向黎太道歉？」但朱智賢未有理會，整個記者會全長約5分鐘，現場不設記者提問。
怕影響家人爆喊
朱智賢與謝東閔在昨晚播出的《東張西望》一同受訪，朱智賢整個過程聲淚俱下，她說：「我承認因拍劇搞到咁，演戲經驗唔夠，抽離唔到。多謝Brian（謝東閔）陪住我，佢都承受唔少，受更多痛苦。」提到家人有否擔心？朱智賢更為激動：「最想同家人講對唔住，唔想自己嘅事影響到人，我有send message畀爹哋，怕影響佢，唔想屋企人俾人講閒話。」朱智賢又向《食腦喪B》台前幕後道歉，指因自己不專業連累大家。問到會否嬲自己犯錯？朱智賢點頭示意說：「好後悔、好內疚，接受唔到自己犯呢個錯。」謝東閔也表示會繼續支持對方：「唔使工作嘅時候多啲陪佢，日子唔易過，外面咁多壓力。」
另外，雖然黎振燁2月初才續簽5年約，但現在無綫決定「棄男保女」，因朱智賢有份演出《踩過界II》、《愛美麗狂想曲》和《食腦喪B》，假若如去年「安心事件」重拍劇集，實在勞民傷財，所以放她一馬，但目前會先煞停朱智賢一切工作，待事件淡化才讓她重見天日。而黎振燁原定9月與視帝黎耀祥合作，主演一套關於拳擊的新劇，但已決定易角，目前只待公司發落。
撰文：余嬌