【本報訊】疫潮持續下學校復課無期，學童在家中百無聊賴，家長頭痛萬分，悠長假期恍如困獸鬥。小學視藝科老師黃浩斌（Jan）在停課不停學之際，化身YouTuber，教一家大細齊齊做手作玩具，讓親子之間共享天倫樂之餘，學童可跳出學習框架，發揮創意小宇宙，「𠵱家唔使返學都要做功課其實好慘，反而可以喺呢段時間發掘小朋友其他長處！」
廢物利用 加入簡單物理原理
記者隨Jan走入空蕩蕩的小學校園，視藝室儲物櫃的畫筆和畫紙久未使用，添上一層灰塵。隔壁的桌上，卻攤滿了一個個手作玩具，有用卡紙、雪條棍、磁石製成的足球遊戲機，有用飲管製成的機械手，這些全都是Jan在這幾個月期間自行設計的手作玩具。
疫潮持續，復課遙遙無期，學生停課不停學，老師為改變和適應新的教學模式絞盡腦汁。擁十年教學經驗的小學視藝科老師Jan決定拍攝短片，教學生製作手作玩具。「最緊要係有趣、好玩」。
好玩的背後，是名為創客教育（Maker Education）的教學理念，主張讓學生在設計產品過程中嘗試解難和發揮創意。「思考過程牽涉到簡單物理、數學、工程、視藝等原理，我唔會限死佢哋要幾長幾高，等佢哋自己試咗先」。對於Jan而言，設計這些手作玩具也是一次新嘗試。他的5歲兒子也一同協助改良產品，給予他不少靈感。「好似個足球機，要用磁石控制雪條棍揮動彈珠。本來條雪條棍冇咁長，好多位都去唔到，佢（兒子）就諗到駁多一條雪條棍」。
隨了要夠好玩外，Jan創作時也考慮材料來源的問題。疫潮下大家減少外出，他不希望學生為了創作玩具而特意出外，於是想到在家中就地取材，開始收集廢物，嘗試將它們轉化成玩具的一部份。他創作的扭彈機的彈弓，就是來自家中的沐浴露。「沐浴露入面嘅彈弓其實好難循環再用，呢條橋就喺廁所諗出嚟，我開始研究邊支嘅彈弓㩒落去係最適合，可以彈到個波上去」。
鬼主意多多的Jan，每星期設計一件作品，目前已累積了八件手作玩具。他慶幸學生反應尚算不俗，「有學生會睇，睇完會影低佢嘅作品畀我，或者喺片畀feedback」。Jan也決定公諸同好，將本來只開放予校內學生的影片上載至YouTube，分享予大眾。「我唔想嘥咗啲片，因為好多小朋友喺屋企都好悶，同埋好多家長都面對住好困難嘅局面，咁不如一齊喺屋企玩吓。」
藉假期培養子女新才能
同為父親，Jan也笑言疫境生活「真係辛苦」。「小朋友最需要互動，佢返學時，有老師、同學，唔會咁依賴你，但𠵱家佢真係得返你一個朋友」。他創作的手作玩具，多為群體遊戲，希望在創作和玩樂之中，讓父母與子女藉此共享親子時間。他認為，父母也乘這次「悠長假期」培養子女的設計思維，助他們發掘新的長處和才能。「疫潮下大把人繼續補習，彌補番返學學到嘅嘢，呢方面唔使擔心香港家長。但𠵱家時間多咗，學習機會其實係多咗，值得發展吓其他嘢，而創意往往就喺最得閒嘅時候出到嚟」。
■記者陳芷昕