睇成龍戲學做警察嘅警務處處長鄧炳強，終於有機會喺立法會「獻技」。立法會保安事務委員會一早請咗PK鄧出席，交代2019年罪案情況，點知因為武漢肺炎爆發，會期一改再改，雖然PK鄧早前都出席過財委會特別委員會就警隊增開支解畫，但議員日始終唔夠時間針對警隊種種批評、尤其令人「羞恥」嘅警暴要求PK鄧回應，下星期終於有機會嘞。
勢與民主派擦出火花
保安事務委員會5月5日、即係下周二開會，據聞PK鄧應承赴會回應質詢。睇PK鄧平時咁多「偉論」，都知佢口若懸河，加上議員就住警隊問題有N個質詢，所以會議都因此加時半小時，由2點半開到5點。
八方聽聞，自稱理直氣壯嘅PK鄧，等去立法會同議員「戰鬥」好耐，可能好想凸顯佢嘅「高尚情操」；見佢喺4.18大圍捕後又主動見傳媒，詞窮理屈抨擊被捕者，民主派都有晒心理準備，當日要同PK鄧嚟個大格鬥，除咗持續未解決警暴問題，相信近日PK鄧去信港台同教大投訴及施壓嘅議題，都會喺當日擦出火花。