2020年過得好快，仲有一個月就踏入抗爭一周年。雖然疫症喺各地爆發，但世界未有忘記香港抗爭。日本著名出版社集英社，會喺5月推出新書《香港抗爭戰記》，作者係日本自由記者小川善照，佢喺舊年反修例運動中多次食住催淚彈採訪。新書最大亮點，就係周庭BB做封面，《戰記》最後一章，仲有周庭嘅訪問。
手足出書登Kindle第一名
訪問中，周庭話呢場be water運動唔係單靠個人，日本亦同香港連成一線聲援。新書未正式面世，訂購已經非常犀利，成為集英社喺amazon銷售第一名。
講返香港，近日大公文匯出咗一本《哭泣的城市》，以為書名咁悲壯，原來係抹黑抗爭者，仲係西環控制嘅三中商連鎖書店不斷硬銷。雖然香港連鎖書店俾西環控制同壟斷，但仲有電子書世界，所以好多手足大大力推介另一本由手足所寫嘅政治科學書，書名係《權力多面睇：香港反送中運動全透析》，書入面分析70幾件抗爭事件、各種創新的抗爭戰術，包括連儂牆、人鏈、「超合作交稅」、和你唱、和你shop等等，本書最近喺amazon繁體電子書店上架，一呼百應下，短短兩日《權力》已經榮登Kindle繁體中文書排行榜第一名。
八方好同意作者嘅一句話，「誰掌握了書，誰就掌握了歷史。誰掌握了歷史，誰就掌握了未來」，抗疫期間唔可以日日出街，不妨睇睇呢兩本書，好好迎來6月。
李八方