公仔箱「巴辣姐」性格豪爽又識做，入行幾年已經深得高層歡心，網民亦對佢幾有好感，算係入到屋，不過巴辣姐經常喺節目中口沒遮攔又語出驚人，就嚇怕師奶觀眾。公仔箱嘅姐仔走得就走，𠵱家巴辣姐可謂上位在望，但係佢最近就同好友「魚蛋」因為日常瑣事搞到好唔開心，本身孖公仔嘅巴辣姐同魚蛋，原本感情好好，乜都一齊拍住上，結果反面收場。
長輩出手擺平
好友做唔成本來冇乜大不了，最大問題係巴辣姐同魚蛋涉及錢銀，佢哋反面後有啲數未傾掂，魚蛋要巴辣姐搞埋手尾先可以走，否則就爆佢大鑊，寧願一拍兩散，巴辣姐當然心有不甘，事關嗰筆數，佢自己只係中間人，所以巴辣姐同魚蛋堅決唔賣賬，兼想極速甩身，而雙方決裂後見過幾次面，都係為傾番筆爛賬，結果最後兩邊傾唔掂數，好友變仇人。最後係點？要由長輩出手，鎮住巴辣姐同魚蛋，佢哋見到老人家出到聲，惟有畀面攞部計數機出嚟，一人畀一份搞掂筆數。幾時都話，朋友關係一牽涉到錢銀就好易變質，所以做重大決定前切記要三思。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。
