武漢肺炎輸出全球，中国嘅反應，由抵賴到卸膊到發惡反咬，從戰狼式嘅大外宣至到派軍力去台海同南海挑釁，再加埋喺香港大圍捕同廢除廿二條，都令人嘖嘖稱奇。
奇唔係奇在啲行為，中国夢講到明係復辟天朝主義，要將中国帶返去佢喺世界嘅rightful place，喺美國做大佬嘅華盛頓共識以外，整返個中国話事嘅北京共識，挑戰美帝地位，呢層佢從來冇掩飾過，冇人會意外。
奇嘅係時間。點解會喺咁嘅形勢出手？
一個可能，係錯判形勢。大家喺中国出面，覺得中美實力依然懸殊，中国冇可能會挑得贏美國。當然，中国以外冇幾個中国專家，可能佢裏面真係掂過碌蔗，我唔敢肯定。但先假設中国真係弱勢，佢都可能錯誤以為自己好強，強到可以反枱，無需再韜光養晦。
趁對家火燒後欄 偷雞博上位
朋友指出，另一個可能係，中国知道自己實力有差距，但係未來個差距隨時仲大，咁不如趁而家對方火燒後欄，博一鋪發難。美國手忙腳亂，呢啲機會，唔係成日都有。2008年金融海嘯係一次，點知最後世界金融秩序都係冇大變，美國金融大佬之位穩如泰山。
今次難得嚟個百年一遇大瘟疫，確實有可能係最有機會偷到雞嘅機遇，如果認真係想改朝換代博上位，唔趁而家仲等幾時？咁都唔去馬，就會令人懷疑，其實實質係諗住無限期匿埋喺韜光養晦黨訓後面，你嗰個乜嘢中国夢，咪只係得個吹字。
呢個邏輯，聽起嚟好似有啲荒謬，但事實上又唔係咁出奇，真係發生過。例如日本帝國喺第二次世界大戰，夢想實現大東亞共榮圈，以超班軍事力量，向下掃晒東亞南亞冇難度，唯一障礙係美軍出手，而美國國力深不見底，同佢打過最終好難贏。
咁咪唔打囉，係咪？結果都係決定打。因為如果一定要打，趁美軍未有防備，嚟一次大偷襲，如果可以將美國喺太平洋嘅空軍力量一舉殲滅，咁個差距就忽然間縮細好多。偷襲成功機會大唔大？唔大。就算偷襲成功，係咪好大機會最終擋得住發火嘅美國？唔係。但最好時機都唔出，等幾時？於是都係偷襲珍珠港，and the rest is history。
亮劍欲殺人質 港加速自救
中国亮劍，喺香港消滅一国兩制。消滅一国兩制，即係要消滅香港。黑色幽默嘅係，香港嘅存在，對於美國以至自由世界，確實係有利，但其實對中国嘅重要性大得多。你瞇埋眼想像吓，如果香港作為地區最後一個條約港口，喺二戰時被移交，或者中共建國時被吞噬，對西方可能係一個footnote，但對中国，成個經濟發展會係點？而如果香港而家消失，對西方傷啲，定係中国傷啲？
中国決定隊冧人質，唔代表人質一定死得快過綁匪。A貨一国兩制正式certified，可望加強香港自救嘅決心。一場武肺，將決斷時鐘，又校快多十五分鐘。
撰文：宋漢生
fb : sunghsblog