西甲豪門巴塞隆拿，喺武漢肺炎疫情期間不斷爆內亂！先係球會單方面宣佈球員減七成人工，到話美斯帶頭反對，巴塞高層之後竟然去搵網軍唱衰美斯，想用群眾壓力要班球星就範，搞到多位董事辭職玩踢爆，主席巴杜美個位都危危乎。無他嘅，講到底都係因為一個「錢」字，武肺搞到巴塞冇晒收入，多單續約同清貨交易都要hold住，最近盛傳夏天佢哋仲大想頭想買阿根廷嘅拿達路馬天尼斯同埋想翻兜巴西嘅尼馬，但實情根本就買唔起！
達史特根續約hold住
武漢肺炎打擊全球經濟，巴塞雖然係全球收入最多嘅球會，全年總收入超過8億歐元（約67億港元）；不過開支同樣驚人，竟然使咗超過9億歐元（約76億港元）！所以巴塞其實係蝕緊錢，賺到嘅好多都用嚟滿足球員同經理人嘅胃口；今年仲無啦啦爆個武漢肺炎，冇晒收入之下搞到巴塞高層頭都大，雖然球員最終都好無奈咁同意減薪七成，不過球會喺疫情下想搵多啲收入都唔係咁易。事關巴塞原先希望同多位主力續約，兼賣走多個冗員，當幫補球會又好，幫美斯買個好幫手亦唔錯。其中巴塞最想同正選門將達史特根續約，不過雙方傾咗幾個月仲未有共識，事關達史特根認為自己係世界上最好嘅門將，但巴塞就唔肯大幅加人工，家陣仲因為疫情令到達史特根、右閘尼爾遜施美度，同埋中場艾法美路嘅續約談判暫停埋。
想套現死貨冇人要
有傳巴塞甚至打定輸數，想以4,500萬歐元將施美度賣去英超，又標價5,200萬歐元將艾法美路賣去意甲，甚至諗過放埋成1.45億歐元身價嘅奧士文尼迪比利套現，但疫情重創球壇經濟，呢幾單交易都只係有價冇市。就連同拿玻里傾咗好耐、打算以5,000萬歐元賣走嘅法國中堅烏姆迪迪，亦已經被請食檸檬。
巴塞賣唔到人，買人亦出現困難，雖然兩大目標拿達路馬天尼斯同尼馬今夏都有「優惠價」，其中前者嘅合約容許佢今夏以1.11億歐元離開國際米蘭，但買家就一定要一筆過科水，蘇州過後就冇艇搭；另據FIFA韋伯斯特條款，尼馬今夏可以用1.64億歐元買斷自己嘅合約重投巴塞，但係計埋尼馬嘅人工，巴塞想簽番佢就要用成5億歐元，疫情下收入大減嘅巴塞點頂呀！睇嚟巴塞家陣唯一可以做嘅，就係希望疫情盡快過去，球圈重拾昔日風光，否則巴塞想續約又唔續唔到、賣人又賣唔成、想買人又冇錢，加埋個個月入不敷支，球會財政分分鐘爆煲！