雖然中國政府同民間極力推卸散播武漢肺炎病毒嘅責任，但呢個世上眼睛雪亮嘅人多的是。近日，曾經喺中國搵食嘅土耳其前鋒布拉卡爾馬斯接受訪問時，就話自己喺中超效力嗰兩年見盡千奇百趣，仲話中國人奇怪嘅飲食文化，可能會喺未來製造更多病毒影響全球。
「中國人咩都放入口」
現年34歲嘅布拉卡爾馬斯，家陣已返咗土耳其，效力緊比錫達斯，但喺2016年就曾經遠赴中超嘅北京國安搵銀。或者因為已離開咗呢個地方，同中國再冇瓜葛，爾馬斯近日接受訪問講到自己嗰兩年嘅體會時，講真相都冇有怕：「作為一個曾經喺中國生活嘅人，我可以話，以佢哋嘅飲食習慣，未來一定會有更多嘅疾病由中國傳出去。有次我經過街市，簡直嚇我一跳，啲攤檔咩古靈精怪嘅動物都賣畀人食，中國人咩都放得入口，佢哋仲好鍾意食狗肉，覺得係對身體好，話係中國文化喎，講番起都覺得震驚。」
爾馬斯對中國幾乎一面倒劣評，佢仲話：「每次作客都要舟車勞頓，閒閒地都要三粒鐘頭車程，感覺好似打NBA咁。仲有，中國同土耳其有六個鐘頭時差，同埋生活環境對土耳其人都唔係太容易適應，所以兩年後我就決定返土耳其喇。」呢位土耳其前鋒為國安上陣32場，射入19球交出6次助攻，佢喺17年就離開中國返去土超加盟特拉布宗，家陣就效力比錫達斯。
大簡為人仔服務跪低
雖然爾馬斯講到明人仔唔易賺，又講到中國可能會繼續有新病毒影響全球，但依然大把人向人仔跪低。早前兩名前中國國家隊主帥納比同簡拿華路，都大讚中國抗疫有成效，係全球嘅良好示範，值得意大利同其他國家學習，但最搞笑係，中國疫情爆發嘅時候，「大簡」就返咗意大利避疫，到疫情喺歐洲爆發，呢位𠵱家教緊廣州恒大嘅教頭又返嚟，仲要歌頌中國。
除咗佢兩個，曾效力西甲艾拉維斯嘅加納中場梅巴拉克，喺呢個時勢轉投中超江蘇蘇寧，為人民幣服務：「錢就係我加盟蘇寧嘅原因。我喺西甲踢咗八年，但我咩都冇，我想像唔到我退役時冇錢嘅日子，中國踢波嘅收入比喺西班牙多，我冇辦法唔去中國搵食。」
