身兼全國政協副主席嘅前特首董建華及梁振英最近籌組「香港再出發大聯盟」，聯盟網站日前提早曝光，見到網站共同發起人有長和系李嘉誠，八方精神「為之一振」，梗係cap圖留念，點知網站未出發先error，大聯盟負責人又紛紛封嘴；到底誠哥有冇加入？呢個謎直至噚日終於有「說法」，但所謂「說法」，又相當耐人尋味。
據知好多傳媒噚日好「榮幸」獲邀分批同董建華、梁振英以及身為大聯盟秘書長嘅民建聯譚耀宗茶敍，綜合傳媒報道加上八方打探，席間董、梁講大聯盟唔係為咗建制派助選，主要都係搞吓「民間口罩計劃」，嘩！要落區派口罩喎，支水喉咪好勁？689話喎，大聯盟係非政府組織，接受捐款，唔知捐款包唔包向地產商揼心口呢？
老董爆羅范湊夠八萬五
咁到底曾出現喺大聯盟網站嘅誠哥，係唔係共同發起人先？據講689冇正面承認或否認，只係話唔止一個發展商加入，仲陸續發出邀請。689咁答，心水清人士應該聽得出直到茶敍為止嗰刻，答案係：冇加入。
咁點解網站驚現誠哥嘜頭？據報，譚耀宗喺其中一場茶敍話喎，聽工作人員解釋，網站當時試行，不經意搵咗一啲相試吓，係秘書處人員唔小心，千揀萬揀，揀中誠哥張相？唔通工作人員係誠哥超級粉絲，珍藏咗唔少閃卡？
老董又重提已經不存在嘅八萬五件事，689話當年自己有份推，老董仲話現任行會成員羅范椒芬曾向佢提出起多5,000個單位，達到總數85,000個；689仲話可惜當年政策目標冇達成，仲話𠵱家香港房屋供應不足證明政策冇錯。又唔講當年幾多人因為政府鼓勵借貸置業，搞到負資產孭成身債！
李八方