金剛同台灣「國光女神」梁云菲（Nana）近日分手，NaNa嘅Ig最近貼出疑似同新歡合照，被對方親熱攬胸，有網民爆料指NaNa分手前已偷食，有嫩男潛水教練，噚日就有報道刊登佢同新歡狀甚親暱嘅合照。金剛回覆傳媒時話好傷心，覺得唔受尊重。唔知點解近日台妹都好好文采，NaNa喺Ig用千字文澄清，而且同羅志祥及愷樂一樣，都係黑底白字，以限時動態求金剛：「這是我的最後一篇關於你的文章，我真的累了，能不能就放過我吧！」金剛經理人就表示唔作回應。
NaNa解釋疑似攬胸相，其實只係坐車時想同前座友人影相，照片出自自己Ig，如果因為有第三者介入，應該要避嫌，而唔會真實地呈現喺大家面前，NaNa覺得朋友好無辜，冇必要承受誤解，為呢件事深感抱歉，佢又強調：「我跟他就真的只是朋友。」
當最後一段情呵護
至於同金剛拍拖期間關於情緒勒索嘅問題，NaNa坦言一直存在：「原以為可以好聚好散，讓彼此在這段關係中更加成長，所以我一直認為以不批評，不過度檢視對方為原則，來訴說會是最好的方式。關於我們之間，我很認真經營。就像是當作此生最後一段戀情去呵護。雖然是這樣的結尾，但我覺得能夠曾經有一段這樣的感情，無憾也值得了。希望我們都能因此成為更成熟的靈魂和獨立的人格。」
另外，NaNa前晚喺Ig限時動態貼出紙皮箱相，留言：「人的感情跟回憶，怎麽是幾個紙箱就能打包完，真諷刺。」似為舊情作斷捨離。
撰文：馮仁昭
