公子L退休後經常四處去旅行，按計劃2月底去咗紐西蘭，玩到流連忘返之際，忽聞香港封關，急忙匆匆回港，自我隔離14天期滿，無事！為小心計，再家居7天，前後共三星期，先至敢再搵老友吃飯，上星期搵到左丁山，去咗希慎中心七樓Cadillac，呢處有大面積，個餐廳係露天，有時風吹不停，啱晒現今環境，起碼通風有太陽照，心理上覺得環境衞生啲。此店自開業以來，碰上示威不斷日子，正是出閘大脫腳，去年年尾生意好轉，周末大旺，以為2020年可以翻身，點知一月開始傳來肺炎噩耗，新春期間已訂晒位嘅宴會全部取消，當事人真係喊都無謂，跟住再來禁聚令、限枱令，老闆簡直絕望啦。公子L與左丁山到此吃午飯之日，只得四張枱坐咗十個人，慘也！
呢度賣墨西哥款式BBQ及配菜，Pizza好好食，牛扒有水準，小品有薯片potato skin，直情令人食不停口。公子L話：「現時做乜生意都要捱本，若然捱得過夏天，國際學校學生及老外必然鍾意呢度，有望翻生。」
要義係若然捱得過！加拿大有一位心理輔導師，專做自由身演講員，到不同商業會議講心理輔導，精神健康等題目，甚受歡迎，去年底已知2020年接單排到今年9月，收入十分可觀。於是唔住多倫多市區多層住宅單位，改為到市郊租獨立屋，以便仔女可在花園活動，點知搬屋之後，加拿大開始有疫情，全世界飛機停飛，所有大型商業會議取消，呢位輔導員本來排到密麻麻嘅演講收費表，兩個星期內變成一張白紙，今年收入幾乎冇晒，於是硬着頭皮寫電郵畀業主：「我冇錢交租，懇請准許我唔交租一段時期。」
公子L話呢類故事，各國都開始有，self-employed自由身本已係21世紀風尚，今次一鋪就畀C19打到殘廢，各地政府推出救市大計，幾乎絕大部份係救企業，救投資者，對自僱人士根本無甚好處，租屋失業人士更加可憐。有乜辦法可以令呢類人捱得過寒冬，政府派錢點派呀？譬如香港特區政府代企業出糧要求公司不裁員，固然唔錯，但已被裁及通利琴行製作部員工、臨時演員、電影製作人員、自由身設計師等等，何來得益？後來搵多幾位老友講及此問題，一位老友話香港人最重要有瓦遮頭，金管局大可強烈勸喻銀行宣佈，由今年五月起至十二月止，全部樓按供樓可暫停7個月，不還本亦不還息，譬如供二十年，月供二萬五千元，可暫停月供／保留供款，即十七萬五千元計入本金之內，明年1月再起供，供樓年期自動延長，希望明年疫情消失，經濟得以回復正常。