【本報訊】去年8月將軍澳連儂隧道斬人案前日審結裁決，九個月過去，當日貼滿文宣的隧道，今日已被大清洗，僅留下「香港人加油」及「天滅中共」等片言隻語的紅筆字，以及地上殘迹。案件審結，但法官郭偉健讚揚斬人被告願意接受懲罰令傷者釋懷是「情操高尚」的言論，令不少將軍澳居民忿忿不平，認為判詞歪理連篇，絕不認同。
「使唔使頒終身成就獎畀被告」
市民麥小姐昨直斥郭官讚揚被告是顛倒黑白是非，「唔知個官讀咁多書係學咗啲乜，唔知佢（法官）啲道德觀喺邊度嚟，唔明點解一個人斬完人仲有高尚情操，使唔使頒個終身成就獎畀佢（被告）呀！」
郭官除讚揚被告「情操高尚」，更指其中一名女傷者推開情緒激動的被告，是「火上加油」，市民林小姐則認為有關判詞荒謬，「如果佢（法官）理據係咁，社會價值觀會變囉！」她直言被告判刑過輕，對裁決失望。
另一名市民陳小姐亦表示：「唔認同判一個有意圖謀殺嘅兇手係『情操高尚』，唔講大家喺社會運動係乜嘢背景都好，淨係斬人呢個動作已經唔可以叫做『情操高尚』，擺明係蓄意謀殺喎！」她更擔心地表示：「今次個判決係好有問題，咁嚟緊好多人都可以作為辯護，話自己有高尚情操啦！」
■記者司徒韋桐