林子博可說是失業者的最強同路人。說來悲涼，但慘烈的現實是，他在2002年亞視裁員潮被裁走；2008年遇上東方衛視停播；2019年服務了11年的無綫，冇情情請食「無情雞」。
今年，失業加疫情，林子博比香港人早嘗箇中滋味，他最近的新歌《男人心聲》是鼓勵自己，也為香港人打氣。「好多香港人面對緊我舊年嘅問題，都係健康同工作問題，所以想話畀佢哋聽，我都過到，點解你哋過唔到呢？」
林子博說自己的人生是「低處未見低」。太太去年得病（平滑肌肉瘤）再逢自己失業，而兩人當年結婚擺酒，正值2003年沙士，他當時又正失業。當年與今日，他說：「好似歷史重演！」
不想愁到抑鬱，就要調節心情，「我覺得任何嘢都會過去㗎！過渡期啫，搵啲方法忘記負能量，好似我咪喺屋企開住部卡拉OK唱K囉，或者出去揸電單車兜個圈！」
48歲的男人心聲，很貼地，很香港人。
撰文：文嘉龍
攝影：郭賢興
呢頭家靠我一個
新歌《男人心聲》令林子博最深刻的一句歌詞是「身處於更低谷也立志」，他說：「我覺得呢句好講中我，因為我真係低處未算低，我面對我太太健康問題，我一心諗住處理我家庭問題，點知我轉頭仲失業，你話係咪『最低』？我覺得呢句講出我心聲！」
今時今日出歌，勉勵自己亦為香港人打氣。林子博說，他和好多香港人一樣，面對疫情和失業之苦，就在訪問當天早上，他接到陳婉婷（同樣去年離巢的無綫「御用丫鬟」）電話。
「佢今日先同我講，哎吔，我乜嘢都停晒，我啲工作都唔知點……我都同佢講，最終都係會過去㗎，唔好俾呢啲嘢打擊到你！我自己喺呢段時間係有少少被打擊到，因為乜都停晒，我覺得自己好似好冇價值，我係咪已經冇咗市場價值呢？係咪已經冇人搵呢？係咪已經俾人淘汰呢？我有咁諗過，我有情緒低落，但係我又成日同自己講，過渡期啫！」
老婆病重，還有兩個小朋友，一個男人孭起成頭家，膊頭很重，「畢竟我唔係有full time，𠵱家我唔係正職，有正職，可能公司都會要求你放無薪假，但係都叫做有月薪。對我嚟講，我放假就真係冇錢㗎，對我好大影響，我𠵱家又租緊樓住，我要交租㗎！我自己又買咗保險，我太太個病之後，我買大咗個保險，因為呢頭家靠我一個，所以我個保險係好緊要！」
去年9月不獲無綫續約，整頓了心情大半年，林子博現在的心聲是：「我唔會諗返轉頭，我唔會諗究竟原因係乜，係咪自己做錯咗啲乜，橫掂都發生咗，你都冇辦法！我覺得呢個世界，值得我關心、值得我在意，只有一樣嘢，就係我太太嘅健康，其他嘢對我唔重要，包括名利，大家知道做呢行好緊要，有名自然有利，但係我已經冇呢樣嘢，只要我太太健康，係最感恩，因為畢竟佢𠵱家面對緊佢嘅病，我希望佢可以完全康復啦！」
喺TVB聽唔到人講粗口
林子博太太董燕君（Shirley）去年4月發現患上罕見癌症「平滑肌肉瘤（腹腔）」，去年尾完成化療，本應在今年農曆年後再接受電療。「我已經唔計我失業呢樣嘢，淨係講佢嘅健康，完成咗化療之後好好彩，經朋友介紹我識咗一個教授，呢個教授願意接收我太太呢個病，話佢可以做電療。我同教授講，不如唔好住啦，因為我睇住佢化療實在太辛苦，好唔人道，侵害性好大，我話不如俾佢唞下先，至少等佢生返啲頭髮，身體recover返，先考慮其他唔同治療；又適逢呢段時間，個天好似整定，我本來係唔想，到最後個天亦都唔畀，因為疫症緣故，本身呢個教授香港內地兩邊走，變咗佢𠵱家返唔到落嚟，暫停咗我太太呢個電療計劃，都係我心入面嗰句，我唔想佢呢段時間有任何治療，整定囉！」
最近兩份報告顯示，總算令人放心，「當然佢嘅腫瘤都仲喺度啦，但係醫療報告好好，已經叫做一路有縮細腫瘤情況，對我嚟講好感恩，呢兩個報告都有縮細，當然腫瘤仲喺度，同埋都仲係大嘅，希望每一次報告都係有縮細，咁就好好喇！」
休養家中，兩個仔女亦復課無期，一家四口待在家中抗疫，增添了不少親子時間，「其實不嬲都多相處時間，𠵱家更多啦！我以前就算喺娛樂新聞台，我都多時間喺屋企，因為我出去跑外景多，中間有時間我可以返屋企，我住銅鑼灣咁近，當然我太太𠵱家冇嘢做，我就更加多時間對住啲小朋友，多咗親子相處時間咪多咗傾偈，多咗一齊親子烹飪，一齊喺屋企煮下嘢食！」
職場生涯面對過三次失業的林子博，他說從來不會對一間機構產生感情，「由頭到尾我唔覺一個企業係有人情味，佢亦都冇必要同你講人情味，包括亞視都係，亞視呀、東亞衛視都係一樣，佢係一個商業機構，做乜要講人情味啫，佢又唔係慈善機構，只不過係喺入面工作嘅人有人情味，所以我係對人有人情味，我唔會對一個機構有人情味；應該話我唔會對機構有感情，我係對人有感情囉！」
亞視年代，是最開心的。「好得意㗎，亞視好似家庭式經營，我服務過唔同機構啦，其實喺TVB，我由踏入TVB嘅時候，我係有啲驚，因為踏入TVB門口，最早期嗰一個月，你係聽唔到有人講粗口㗎，你會見到一啲好紅嘅藝人，迎面見到，佢會主動同你打招呼，你呢下先驚，大家好似步步為營咁，同埋啲人唔會講粗口，可能以前亞視啲人，一入門口就講粗口，一入去canteen就噚日乜乜乜乜、你條乜乜乜，大家好好玩，唔會有人寫log紙（行內術語、即投訴紙），唔會有人因為講粗口而寫log紙，但喺TVB你做每樣嘢都要步步為營，你做任何嘢可能轉頭上面已經有人打電話落嚟，『你頭先做咗啲乜呀？』我早期入TVB係好驚，當然慢慢習慣咗佢哋文化就冇嘢啦！」
又係面對失業同疫症
林子博因為參加亞視的《電視新星大賽》入行，參賽前他已經是各卡拉OK的男主角，那個年頭，卡拉OK的MV孕育了不少大明星，「我同期有張松枝、有古生古天樂、蒙嘉慧、歐陽妙芝、陳浩民……」
拍卡拉OK前，林子博是舞台劇演員。他曾在劉德華投資的「無名髮」髮廊內當兼職「洗頭仔」，那時候三哥苗僑偉和冼灝英是常客，還有舞台劇監製蕭鍵鏗，「拜咗佢做師傅！鏗哥話見你平時同啲人玩到古靈精怪，你都好啱食呢行飯喎，不如你試下跟我去拍嘢！」自此加入了蕭鍵鏗當時組成的劇團當演員。
由話劇演員到參賽《電視新星》再順利加入亞視，以為無風無浪，結果大裁員不獲續約，「2002年尾離開ATV，嗰時又係完約，最後唔續約，我做綜藝計月薪，因為我爆騷爆得幾勁，嗰時做《今日睇真啲》，之後《睇真啲》執咗笠，開始冇節目又冇劇，完咗約就離開ATV！我又唔知點解咁大膽走去結婚喎，我同我太太識咗九個月就簽字，嗰時供緊一層將軍澳居屋，到咗2003年有人搵我入去東亞衛視，好得意㗎，你睇返2019年，即係𠵱家呢段時間，同我2003年好似。我記得我結婚係沙士高峯期，我3月28號註冊、5月6號擺酒，我好驚冇人嚟，我請咗十幾圍㗎，當年好多人嚟，大家都未識死，未知發生乜事，如果今時今日擺酒就大件事，真係冇人嚟！我𠵱家睇返擺酒啲片，乳豬全體推出嚟嗰時，啲人係戴口罩推出嚟！當年都係面對緊失業同疫症，𠵱家今時今日我又係面對緊失業同疫症，其實一模一樣，好似一個循環，歷史重演！」
當年與今日相比，當下的壓力更大，「嗰時壓力冇咁大，雖然供緊樓，但係有限錢，嗰時供樓幾千蚊一個月，我喺沙士之前買嘅居屋，𠵱家賣咗啦，我租返樓住，隔咗咁多年，𠵱家唔同喇，因為我係一家四口，以前我哋兩口子，我冇嘢做，我太太做嘢頂住先囉，但係𠵱家我哋兩個都冇嘢做，仲有兩個細路喎，仲要租緊樓，𠵱家壓力係大！」
最近這幾個星期，他更開始懷疑自己，「近排的確我係有少少打擊，有少少因為𠵱家個疫症緣故，因為所有嘢都停咗，最近呢幾個禮拜，我有懷疑過自己能力，我唔敢同我老婆講，但係我學緊點樣去調節，因為我唔想我有抑鬱，我唔想自己有情緒問題，我唔想有抑鬱呀躁狂，嗰啲好大鑊㗎！除咗唱歌、揸電單車之外，我要成日同自己講，會過去㗎，一定會過去，唔好畀呢啲嘢打擊到自己，呢個係我個心聲囉，亦都係《男人心聲》入面主要精神，話畀人聽，要調節自己心態！」
林子博說：「我覺得都係嗰句，我太太健康，我幾辛苦又有乜所謂啫！」
【後記】鋪路
做了多年「娛樂新聞台」記者，林子博當然知道訪問內容需要甚麼，他還騎着他的「哈利戰車」到現場，希望畫面更顯「男人味」。電單車除了減壓，更為他鋪路。
「嚿年8月有個節目叫做《歐洲鐵騎遊》，我𠵱家諗返轉頭，好似幫我離開咗TVB鋪路咁！成嚿嘢係我自己傾返嚟，我直接同BMW傾，傾sponsor傾流程幾多集，原來做一個製作人又幾過癮喎，𠵱家我都嘗試緊去做，我希望得啦！」
轉個靚彎，又一條路行。
場地提供：角川Kadokawa