早排有傳媒報道，話巴西球星尼馬嘅52歲阿媽高嘉妮芙搭上咗只係23歲嘅猛男泰亞高拉莫斯，事件成為咗傳媒焦點，結果網友起咗呢位靚仔嘅底之後先發現，原來同高嘉妮芙一齊之前，拉莫斯都同過唔少男性拍拖，最終目標係尼馬。而近日有報道指高嘉妮芙因為壓力太大，已經速撇咗拉莫斯。
自從上個禮拜日，高嘉妮芙喺自己嘅ig上載同拉莫斯含情默默互望嘅合照公開戀情後，呢場相隔近30年嘅忘年戀成為焦點，同時都令外型一流嘅拉莫斯人氣急升。但所謂「人怕出名豬怕肥」，一起底就發現拉莫斯原來係雙性戀者，過去曾有四個男朋友，當中最爆都係原來同過尼馬嘅好朋友，巴西著名男演員馬亞一齊過，另外仲有尼馬嘅私人廚師行埋，認真犀利。
雖然做仔嘅都冇介意阿媽同邊個一齊，但咁多舊史被人摷番出嚟，難免會有影響。據指因新聞爆出後，高嘉妮芙嘅屋企人要佢盡快同拉莫斯斬纜，結果最終都係放棄咗拉莫斯，決定分手。有指家陣拉莫斯已經搬離高嘉妮芙嘅豪宅，同屋企人返咗巴西。