前英格蘭國腳碧咸（小圖）擔任主席嘅美職聯球會國際邁阿密正醞釀至少一宗重大收購，據報打算喺今夏引入皇家馬德里嘅失意球星占士洛迪古斯（J Rod），消息更話碧咸已分別同皇馬主席佩雷斯，仲有J Rod本人聯絡，碧咸更向J Rod表示，希望對方可以成為國際邁阿密嘅核心球員。J Rod對上兩季俾皇馬外借到拜仁慕尼黑，今季回歸皇馬後仍然唔可以得到教練施丹嘅歡心，至今上陣13次射入1球。呢位28歲嘅哥倫比亞國腳同皇馬合約會喺2021年6月到期，據悉現時身價已由當年轉投皇馬嘅8,000萬歐元下跌至約3,500萬歐元，估計碧咸有機會以更低價格收購到呢位球星。