自冬季轉會窗開始，德甲球隊RB萊比錫射手迪姆華拿就同英超嘅利物浦多次扯上關係，華拿自己亦都對轉會傳聞毫不避忌。英國傳媒報道，只要紅軍喺6月15號前滿足到華拿5,200萬鎊（約5億港元）嘅違約金條款，就可以帶走呢位24歲德國前鋒。
華拿學英文秋波已送
英國天空體育報道，原來華拿上年夏天同萊比錫續約時加入咗違約金條款，只要有球隊願意喺6月15號前向萊比錫支付5,200萬鎊違約金，就可以得到呢位德國國腳。不過喺疫情影響下，有指紅軍未必會喺限期前簽華拿，因為英超停擺已經令球會收入大減，加上目前未有確實嘅復賽時間表，呢啲因素都可能會令紅軍大手筆買人嘅意欲減低。
今季華拿表現大爆發，各項賽事為萊比錫上陣36場，共交出27個入球及12次助攻，25場德甲就射入成21球，又幫球隊淘汰熱刺殺入歐聯八強，出色嘅表現令唔少球隊都對佢有興趣。不過，佢似乎一心諗住加盟紅軍，仲曾經話：「紅軍有高普，佢係世上最出色嘅領隊，佢又係德國人，我嘅踢法都好適合佢哋。」最近仲有指佢家陣學緊英文，似乎為轉戰英超做晒準備，但睇嚟華拿呢個希望可能因為武肺要等多陣。
達洛治身價嗌高一倍
喺利物浦諗緊點減少支出嘅同時，死對頭曼聯就希望透過賣人喺疫情下賺番筆。21歲嘅達洛治今季機會唔多，有指法甲巴黎聖日耳門（PSG）希望下季引入呢位葡萄牙右閘，曼聯就為佢標價3,500萬鎊，足足係2018年買佢嗰陣近1倍嘅價錢。
今季季初，曼聯領隊蘇斯克查由水晶宮簽入英格蘭右閘雲比沙卡，後者即刻成為正選，令2年前由波圖以1,800萬鎊轉投曼聯嘅達洛治，今季冇咩上陣機會，只曾喺英超上陣四次，當中得一場正選。有指PSG希望買呢位喺紅魔失意嘅葡兵，但據外國網站transfermarkt估計，家陣達洛治嘅身價只值1,620萬鎊，但紅魔就為就為佢標價成3,500萬鎊，本來呢個價唔算好高，但對於一個傷足半季又冇咩上陣嘅球員嚟講，似乎有啲唔合理，加上疫情影響，似乎當PSG係水魚喎！可能紅魔近年成日做水魚，家陣想試吓賺番人一筆，睇吓有冇儍仔會上釣。