留家抗疫從來不是露宿者有權利選擇，近月有基層因疫情失業而要露宿街頭。他們當中有人覺得染疫比貧窮可怕，有人視疫情和貧窮一樣致命，唯一共同目標只有求存。社區組織協會幹事吳衞東稱，本港逾千名露宿者中，約一半領綜援過活，另一半則有工作，以往絕少尋求協會幫助。惟1月開始，向該會申請緊急援助基金的個案明顯增加，「以往一個月會有5個人搵我哋，𠵱家一個月超過20人。」
「自從冇嘢做之後，欠租3個月，最後業主鎖咗門，要瞓公園，都幾慘。」59歲的Peter在疫情中失業兼失家，被迫流落在通州街公園的長凳過夜，「天氣係毛毛雨，有少少風，坐到差唔多3點幾就睇小說，睇到攰就起身郁吓，到天光為止，都凍㗎。」他不想露宿，經吳衞東出面調解，業主才肯開鎖讓他有家可歸。
任職酒樓點心師傅30多年的他，月入2萬多元，一直以3,000元月租深水埗劏房，但去年9月失去長工，轉靠兼職為生，自12月更連兼職也不保，經濟拮据，1月起連欠三個月租金，「同朋友借，借到𠵱家欠人哋3萬，借到朋友都發爛渣，冇得借啦！」
害怕染病無錢醫
重返劏房生活，Peter仍受疫情困擾，「講真擔心係擔心，呢啲（疫情）盡量避。𠵱家連外出都怕。」
Peter坦言染疫比貧窮可怕，「瞓街仲有生存機會，中招呢，一來冇錢醫，二來有錢都未必醫得到。」
另一露宿6年的謝叔，則視疫情和貧窮一樣致命，「窮係生活唔到，等於死啦；中咗招都係一樣，都係死。」現時他每月靠3,000多元綜援金過活，根本沒多餘錢購買抗疫物資，「擔心唔到，（口罩和搓手液）係教會送。」
