港澳辦、中聯辦連日向郭榮鏗等民主派開重炮，更無視《基本法》第22條，聲稱對港內部事務具有監督權，加上拘捕李柱銘等人、以武官治港，有民主派中人直言，由現在到9月立法會選舉，「中共必定一拳一拳打落嚟，想逼港人同民主派投降」，他們已作好心理準備將有更多民主派議員被捕、被DQ，因為泛民中人相信，北京以為疫情下對民主派「打到盡」，港人及國際社會也不會有太大實際行動，但北京似乎不明白，一旦事情發展不如他們預期，「北京又有冇預計後果會點？」
不信港再有大規模示威
有泛民中人稱，他們預計未來幾個月的日子十分難捱，「郭榮鏗嗰日見記者，講到哽咽真係有感而發，佢真係預咗北京、港府會DQ佢，甚至拉佢都唔出奇」。該人士又稱，為阻民主派在9月立法會選舉取得過半議席，泛民相信北京「有咁盡做咁盡」，「有人話北京唔只會DQ民主派議員、甚至拉人、打壓網上及傳媒也在所不計，好多民主派有晒心理準備會被拉，但冇人會縮」。
事實上，北京不理《基本法》、一國兩制崩壞也要出重手，除了9月立法會選舉必定要贏，另一原因正如建制派所說，北京不怕國際社會、也不信港人再有大規模示威。另一政界中人稱，「用佢哋所謂低線思維，就係輸得起」，但他認為北京常常「計錯數」，「反送中一開始話係國家安全，一步不讓，結果計錯數令成件事收唔到科，仲畀美國同國際介入；貿易戰又係，開頭又話唔怕打、堅持同美國打，以為美國會妥協，點知又計錯數，咪又要同美國簽城下之盟」。若今次又「計錯數」，「真係毀咗一國兩制、外資本地資金走晒、呢個金融震盪北京又係咪預咗輸得起？」
季陶
周一、三、五刊出