台灣紅星羅志祥同女友周揚青分手，仲被女方發長文踢爆賤男惡行，話佢喺拍拖九年期間經常出外偷食，仲約唔同女仔返屋企開性愛P。其實性醜聞呢啲衰嘢喺英國球壇亦屢見不鮮，今年如果要搵一個新賤男之最，非曼城後衞基爾獲加莫屬喇。基爾獲加今年二月俾一位叫Lauryn Goodman嘅真人騷模特兒爆料，指有咗佢嘅骨肉，而且仲喺佢同正印Annie Kilner瀕臨分手嗰陣同佢搭上。Annie幫基爾獲加生咗三個小朋友，所以當呢單醜聞一出，呢位曼城右閘立即被冠以新賤男嘅稱號。仲估唔到嘅係兩個月後，佢又被爆料喺疫情期間違反隔離令，搵咗兩個援交女大學生「送外賣」，大開4P性愛派對，仲有相為證冇得抵賴！事後曼城譴責就梗喇，不過暫時未知有咩處分，但肯定嘅係呢兩單嘢搞到佢嘅形象直插谷底。除咗獲加，英格蘭球壇仲充斥住唔少賤男。有瞞住老婆偷食召妓嘅朗尼，「勾義嫂」嘅就有車路士前隊長泰利，同埋前曼聯好好先生傑斯，開群P嘅就有前曼聯嘅拿尼同路爾斯安達臣，當時仲係同隊嘅基斯坦奴朗拿度都有傳一齊玩㖭！