中小學停課已久，不少家長牙痛咁聲，特別係子女入讀名貴學校嘅家長，地產P已升上高位，收入應該唔少，都要呻幾句：「個女讀小一，每月學費萬幾，加埋雜費，二萬銀一個月冇走雞，日日唔駛返學，白交學費，幾肉痛！」左丁山笑曰：「有Zoom上堂呀嘛！照樣有嘢學啫！」地產P話：「差好遠噃！學費咁貴，與同學老師幾乎零交流，零互動，點值呀？」此則是選項問題，入名貴學校預咗學費貴，如記者E個仔入讀學券幼稚園，小YY個女讀津貼學校小一，咪唔會嘈學費白交囉。全世界學生現時都有同樣問題，上網上課是否值得？嗱！啲醒目兼IQ高嘅成年學生有幸入讀華頓、史丹福、西北大學讀MBA，夠威啦，點知因對抗疫情，MBA改用Zoom上課，喂！一年交十幾萬美金學費，點值呀？於是學生簽名抗議，要求削減學費，但大學唔肯。史丹福商學院話：「學費都未夠大學嘅教師薪酬、教學材料及教學設施成本。」一於唔肯回水，學生變咗進退兩難，因為難得有機會入到名校，畢業後聲價不同，打工身價亦會高啲，如選擇讀咗一個學期就退學，正是兩頭唔到岸，何況依家失業人士眾多，去邊度搵到份工噃，總之係唔夠運。2019年夏天經濟好景時，歡天喜地咁辭工入讀華頓、史丹福，人人羨慕，怎知道半年後就日日在家坐困愁城，一命二運三風水，此之謂也。
小學生幼稚園生唔返學，九月後升班則唔知追唔追得上。小YY有此擔心，左丁山代佢問大師兄森哥有乜好計？森哥話：「易到極。幾十年來一條橋，就係趁暑假溫習功課，萬試萬靈，你唔好話老套，總之勤有功，唔好生疏就掂。」噚日森哥送來一套幾十年老字號（智慧出版社、成功出版社）出版嘅數學、英文、中文重點學習及重點測驗系列，供小學一年級上下學期課程用。森哥話：「叫小YY畀個女做晒所有練習，升上二年級包保追得上程度有餘。」一共六本練習交畀小YY，佢個女小小G一見就藐嘴，但亦被捉住每日每科做兩版，做落又覺得唔係太難，英文尤其容易，中文、數學就難少少嘞。森哥話：「我兩個仔由小學開始，就做呢啲練習嘅嘞！」咁又抵佢嘅，兩位公子都在美國長春藤大學畢業，名校MBA，在紐約華爾街老早站穩陣腳。小YY媽咪讀小學時，都做過成功智慧啲練習！森哥話，最近佢與中大師弟關百豪之「實惠」講咗，交書畀實惠試賣，原來有人仲記得，幾百本，幾百本咁樣入貨。關百豪正是變則通，傢俬既然市道低迷，最近售賣香港生產口罩，其門如市，林健鋒議員製造口罩要搵門市嘅啫，與關百豪一拍即合，大家都知道時間即金錢也。
（按：今晚七時有中大新亞校友、著名臨床心理學家郭碧珊分享疫境自強經歷，講解在疫情下如何保持精神健康心境，中大校友事務處facebook專頁直播。）