【爆相爆片】現年49歲嘅前港姐周嘉玲，當年憑電影《重慶森林》性感空姐一角備受注目，有讀者Sammy透過《蘋果》嘅「爆相爆片」，透露日前見到佢喺赤柱跑步，Sammy話：「星期六大約3、4點，第一個反應係明星喎！一眼就認出佢係周嘉玲，加上𠵱家好少人唔戴口罩出街，見到有人唔戴口罩都會望多兩眼，佢好易認，見佢喺黃麻角道來回跑咗一個鐘左右，步速頗快，唔見喘氣。」仲話周嘉玲好爽朗，冇帶毛巾，索性用衫領抹汗。
周嘉玲曾闖荷李活拍電影，2005年閃嫁比利時籍印度裔室內設計師Darryl Goveas，婚後育有一女，前年佢再度演出曹斐執導嘅電影《監獄建築師》，近年就專注童裝生意，甚少公開露面。
姜大衛陪仔睇鼓
曾經同周嘉玲喺1994年合作《再見亦是老婆》時傳緋聞嘅姜大衛，日前同太太李琳琳及孻仔姜卓文（細John）喺又一城嘆茶行街。佢哋喺台灣食店食完下午茶後經過一間銀行，停低睇一張有關疫情嘅通告，之後李琳琳陪細John入店睇樂器，研究一套逾萬元嘅鼓，姜大衛就幫太太拎飲品喺門外等候，大約10分鐘，佢哋就離開。生得高大嘅細John一心想憑個人實力加入娛樂圈發展，雖然去年參加ViuTV節目《全民造星II》被叮走，但似乎叮唔走佢嘅歌手夢。
