趣趣地：C朗嫂西國ig女神后座不保

基斯坦奴朗拿度（C朗）女朋友佐真娜一直係傳媒同社交媒體嘅寵兒，佢ig曾經係西班牙最多人follow嘅賬號。但係喺最新嘅西班牙ig排名中，佐真娜不敵新星Ester Exposito，由第1位跌至第3位，而排第二位嘅係另一位西班牙演員和模特兒Ursula Corbero。

Ester係西班牙Netflix劇集《名校風暴》嘅女主角，佢早前喺ig上載嘅一段健身影片，就有4,500萬人睇過，佢嘅ig賬號追蹤人數更躍升至2,010萬人。第二位嘅Ursula就係Netflix劇集《紙房子》嘅演員，ig賬號追蹤人數就有1,830萬人。至於佐真娜嘅ig就有1,770萬follow。其實佐真娜今次不敵兩位西班牙Netflix女星，某程度跟武漢肺炎喺西班牙肆虐有關，因封城關係大家都留喺屋企煲劇，所以今次佐真娜敗陣，就有點非戰之罪喇。