政圈早已流傳全國政協副主席董建華及梁振英會牽頭籌組香港再出發大聯盟，團結建制派應付立法會選戰，《星島日報》周四報道大聯盟有過千名政商界擔任共同發起人，包括多位地產商同埋政協常委唐英年等，但因為疫情同限聚令可能會押後原定下周一嘅成立日。噚日朝早佢哋嘅網站率先曝光，《蘋果》發現發起人一欄包括長和系李嘉誠，好驚訝超人都加入咗呢條戰線；點知大聯盟網站曇花一現，9點半後已經瓜柴，只顯示「網站建設中」字句，只能透過Google頁庫存檔睇到部份內容。
「智將」雲集 隨時倒米
唔知係咪成立消息提早外洩未ready？八方就大聯盟成立向擔任秘書長嘅全國人大常委譚耀宗查詢，獲覆不便透露細節，有消息時再公佈；身為發起人之一嘅工聯會吳秋北就話唔會證實任何報道內容。
據知大聯盟設喺中環商廈嘅辦事處由一名富豪免租提供，副秘書長包括多位社團掌舵人，好似身兼全國政協常委嘅香港廣西社團總會永遠會長譚錦球、全國政協委員兼港區省級政協委員聯誼會會長施榮懷，同樣身兼人大代表嘅九龍社團聯會會長陳振彬及新界社團聯會理事長陳勇等，各團體都係建制陣營選舉動員機器，當中亦包括梁振英愛將、前行會成員張志剛。
民主黨立法會議員林卓廷就謔稱，若然呢個聯盟積極參與9月立法會選舉為建制派候選人助選，「以佢哋（董建華、梁振英）呢班人嘅公信力，隨時令民主派候選人間接獲益」。
李八方
