歐洲各大聯賽繼續因為疫情關係停擺，先前重災區意大利已經有唔少球員確診，幸未有確診個案嘅意甲球隊國際米蘭，原來喺一月份嘅時候曾經有集體爆發感染武肺嘅疑雲。效力國際米蘭嘅比利時前鋒盧卡古喺周二透露，原來1月份時候隊內有23至25位球員出現發燒同咳嗽症狀，但係當時未有人進行過武肺病毒檢測。
史堅尼亞踢到暈被換
早前意甲嘅受感染球員數字已經增加至15人，當中包括有祖雲達斯嘅保羅戴巴拿、馬度迪同魯加尼，仲有費倫天拿隊內三位球員等。雖然國際米蘭慶幸冇任何職球員確診，但係禮拜二盧卡古喺ig做直播嘅時候就提到，其實隊內曾經出現武肺可疑個案：「上年12月歇冬後我哋有一個禮拜休息時間，當大家歸隊之後，球隊陣中有23至25位球員唔舒服，我發誓唔係講笑！」不過照盧卡古所講嘅情況，其實國際喺一月都同過部份中招球隊交過手（見附表），包括阿特蘭大同埋費倫天拿，家陣真係唔知到底係國際球員播毒定係俾對方傳染喇，成隊國際A隊得27人，咁咪即係全隊都有病徵?
除咗提到隊內有好多人發燒同咳嗽外，盧卡古仲諗番起1月26號，國際米蘭喺主場迎戰卡利亞里嘅聯賽入邊，隊內有位球員踢咗好短時間就要離場：「我哋喺對陣卡利亞里嘅時候，25分鐘就有一位後衞要離場，唔可以繼續比賽，仲差啲暈低。」盧卡古所指嘅隊友就係斯洛伐克中堅史堅尼亞。睇番紀錄，史堅尼亞真係踢咗17分鐘就因為唔舒服離場，球隊賽後解釋就話呢位中堅係患上流感。翻睇國際喺一月份嘅賽程，其中對過嘅阿特蘭大同費倫天拿，呢兩隊之後都有球員確診武肺，真係唔敢講會唔會同呢次疑似集體染病嘅事件有關。
冇做病毒檢測唔知死
盧卡古都提到自己其實喺一月份都有出現病徵，不過同樣不以為意：「每個人都出現發燒同咳嗽病徵，我喺熱身嘅時候都覺得熱過平時，但係我已經一年之內未試過發燒。踢完卡利亞里之後嘅當晚，本來我哋要出席運動品牌邀請嘅晚宴，但我拒絕咗，直接返屋企瞓覺。因為當時我哋冇做病毒檢測，所以永遠都唔知自己有冇事。」由盧卡古所講嘅情況睇得出，意大利初期對於武肺嘅防範實在唔夠。不過近期有當地報道，意甲喺未來將會要求球員回歸訓練嘅時候，必須接受血液抗體檢測，咁就可以知道佢哋自己有冇中招，到時盧卡古心中嘅疑問亦都可以解開喇。