三個月來，左丁山啲晚飯飯局全部冇晒，中午飯約大幅度減少，有時一個人走到上海總會食碗雪菜肉絲麵及菜肉雲吞就算，見到食飯人少，座位疏落，都係食得唔多有癮。點知出外食少咗，最近發覺反而肥咗少少，點解呢？老婆話：「你可能食得麵包多，成日食。」好似又係喎，心理學家話食物可以給人快樂感，滿足感，心情悶，在家時間多，不覺意間就會食多咗麵包，每次行經IFC嘅city'super就忍唔住行入去買Little Mermaid麵包，一買就一大堆，返到屋企畀老婆哦：「買咁貴嘅麵包，仲要買一大堆。」唉！食麵包啫，有乜好意思同人去搶購瀝源邨嘅十蚊三個麵包！
前些時龐公子建飴約食午飯，去上海總會樓上之五陵會，吃得飽飽，呢日就唔食麵包咯。左丁山在1982年加入五陵會，有十幾年一旦冇約會就經常到會所食碟頭飯，睇男人成人雜誌（按二十世紀八、九十年代之五陵會裝修簡單，有男士專用餐廳，女士不得入內，食碟頭飯為主，有Playboy、Penthouse、Hustler等等雜誌任睇），飯後李福深先生常在此與會員鋤大D。到咗1998年左右，好多會員（以律師、會計師、金融經紀為主）移民，會員日少，左丁山覺得冇癮，退咗會。近十年間由梁志堅老哥做主席，妙手回春，將五陵會變成高端食肆，一位難求，極難入會做會員，如果唔係龐公子，左丁山冇機會重回舊地品嚐精美小菜。龐公子係紅酒專家，呢日帶來一瓶紅酒，左丁山只識飲，唔識好似畢明咁同佢品評紅酒，只識問：「目前好少機會同朋友共飲，一個人在家飲唔到一支紅酒，有人話依家流行買半支裝，你點睇？」龐公子話：「一人飲半支裝係可以嘅，不過另有一個方法，由我的MIT校友創製，就係Coravin，我間舖頭有得賣，係一個插入酒樽木塞嘅用具，插入去有泵抽紅酒出嚟，逐杯飲，一支酒可以分幾晚飲，好過癮，呢排幾多人買。」又幾好噃，人人在家，晚上不出外吃晚飯，好飲紅酒之人正好利用此Coravin（YouTube有片教人如何使用）。上星期六（4月18日）畢明專欄提及龐公子提供紅酒實習職位畀香港年輕人到波爾多學師，可惜受阻於肺炎疫情，不知是否可以如期落實。今年全球混亂，各行各業無不受影響，大概只有亞馬遜、騰訊、阿里巴巴、賭網等公司等得益。傳聞西歐農業望天打卦，農產品收成期間，因封關鎖國而無法搵到東歐外勞到農地收割摘果，英國農場要特別包機從羅馬尼亞運入採摘果樹嘅外勞。波爾多收成期在8月下旬開始，9月進入高峰期，現在因為lockdown，一切準備工夫得個講字，當地依家都未諗到方法安排採摘葡萄，連2019年紅酒品評活動都會受影響。