官場大地震，雖然噚日先正式宣佈，但前日接近中午已經陸續有報道爆料，預告決策局將要「換馬」。身兼行政會議成員的工聯會副會長黃國健，對高層換人都有些微意見，不過就係借題發揮針對公務員，話名單未正式公佈，就已經有人洩密，仲實牙實齒咁話係公務員系統出咗問題，要追查咁話，但八方擔心真係捉鬼，隨時捉翻自己友！
吩咐聶德權要整頓
黃國健話自己事前未收到風聲，又話高官人事變動係機密不得外洩，要經中央批准先可以公佈，仲吩咐聶德權要喺公務員入面捉鬼，上任新職後要好好整頓。內鬼到底係邊個？八方都好好奇，重組一下「洩密機密」嘅時序，八方發現「兇手」好可能近在眼前，因為日前最先爆料嘅，都係親政府媒體，而爆料時間又咁啱得咁蹺，就係行會開完無耐，外人唔知行會有冇正式講換馬，定係有人喺行會收到風聲，聽完「地震」消息後急不及待要洩密？睇嚟要整頓嘅，可能唔只係公務員，仲要睇埋曾經被林鄭劣評「表現差強人意」嘅行會先得。