現年40歲的楊怡和細她5年的羅仲謙結婚4年，今年情人節前夕宣佈升呢做父母，昨日楊怡在Ig自爆早產，宣佈女兒「小珍珠」出世了，下月可陪她度過首個母親節！昨晚於中環開工的羅仲謙，透露B女是4月16日出生，出生時不足6磅，他入產房剪臍帶時，為免心情緊張，惟有當正自己拍醫生劇。女兒出生時，他坦言感動落淚︰「嗰一刻比想像中更感動！」
羅仲謙早前特地請了幾天假陪伴太太，待女兒出生後，昨日他於中環首日復工拍新劇《陀槍師姐2020》。他透露老婆楊怡已返家休養，剛榮升父親的他難掩喜悅︰「BB是4月16日出生，比預期早產了10至20天，我哋係聽醫生建議開刀，現在母女健康冇問題，囡囡出生時唔夠6磅，成粒珍珠米咁，所以就嗌佢小珍珠。」問BB樣子似媽媽還是爸爸？他說︰「我覺得似我家姐多啲。」談到個個讚BB靚女，他煞有介事話︰「唔讚得！我都成日忍住，外母成日提我唔好讚個女靚，要話佢臭臭豬、曳曳，不過阿女真係令我好掛心。」
他說待產期間都有開工，頻撲兩邊走，但生產時就全程陪住老婆︰「我有參與剪臍帶，啲護士有問我驚唔驚、得唔得，我話拍得多醫生劇，應該得啩！當拍劇囉。」他說入產房時一身裝備，心口掛滿相機、DV，醫護人員亦有幫忙拍攝。他憶述女兒出生時，自己感動流淚︰「佢出世時我有喊，因為比我想像中更感動，之前係隔住太太個肚去感受BB，𠵱家可以抱住佢，當我接觸女兒身上液體時，真係好溫馨。」
母親節最佳禮物
羅仲謙亦好識做，第一時間慰問老婆，他透露暫未為愛女改名，會交給長輩決定︰「最緊要筆劃唔好太多，否則罰抄就慘，羅字已好多筆劃。」他說有幫手湊B，學習餵奶及換片︰「不過都驚自己粗魯扭親BB手腳。」他坦言今天因為等女兒吃完奶才離開，不惜遲到︰「個女日日都唔同樣，所以每日都要拍低做紀念，等佢嫁嗰陣可以多啲武器。」
他透露楊怡目前是奶粉、人奶間住餵，又指女兒是母親節最佳禮物，全因BB是男家第一個孫子︰「個女萬千寵愛在一身，名副其實掌上明珠。」問到會否再追B，他說︰「唔得住，醫生話最快要半年至9個月。」至於女兒的百日宴，他說不會鋪張。
羅仲謙為女兒感動到喊，而太太楊怡昨日於Ig貼一家三口合照，自爆B女早產時，她形容心情是戰戰兢兢又無比滿足：「十月懷胎，有辛苦，有開心，這份上天給予我們的禮物，對我們來說是無比幸福的，急不及待想和大家分享『這期待已久的禮物，我們已經緊緊的捧在手心中。』雖然較預期早了點，但感恩一切順順利利。」
疫境誕B謝醫護
疫情下生B，楊怡的心理壓力可想而知，因此她特別感謝醫護，更鼓勵大家保持正能量︰「未來充滿着未知之數，但我們一家堅信幸福總會眷顧每一個人，願每一個逆境，香港都能平安過渡。」她亦提到囡囡因為輕磅，婆婆冠以「小珍珠」乳名。
剛榮升爹哋的羅仲謙，也在Ig留言感謝太太，至於榮升姨媽的楊卓娜回覆稱：「我見咗BB喇，BB個樣似謙謙多啲。」與楊怡份屬契兄妹的馬浚偉說：「我啱啱先知，好開心，我又做舅父，但疫情未穩定，唔會探住，等疫情穩定再請佢哋一家食飯兼見面，阿怡結婚嗰陣送咗大金豬牌，遲啲會打隻金豬仔畀小豬女。」其他圈中好友紛紛送祝福，繼有胡定欣、岑麗香、周勵淇、陳山聰、李施嬅、謝安琪及梁詠琪等。
採訪︰卓寶花、唐琛悠
攝影︰陳慧安
