特區政府高層人事地震塵埃落定，新加入嘅噚日有機會出嚟見人，但被人踢走嘅，就只可以留低幾句離職感言，其中四年幾以來毫無貢獻嘅楊偉雄，仲喺噚日自己65歲生日慘食無情雞，而佢對於收到777送嘅呢份生日大禮，就話尊重特首決定同樂意離任，仲表明對出任創科局長無怨無悔。有IT人同八方講，其實可以去做品酒師，話佢蒙瓶試酒可謂百發百中！
楊偉雄做創新及科技局局長咁耐，大家最深刻記得，應該只係佢好自豪咁話自己見過Steve Jobs，仲要強調「我真係見過」；有網民就惡搞，話佢今次唔係見Steve Jobs，而係自己做咗「No Jobs」，仲係到咗羅致光講嘅「中年」先變「中年失業」。
蒙瓶試紅酒百發百中
阿No Jobs就話，離任後會展開人生新一頁，話繼續為香港同國家嘅創科發展貢獻力量，但有IT人同八方講，唔止香港創科界覺得佢唔掂，內地創科界都一樣，有內地創科巨頭見完佢，直情問點解佢可以做局長？
咁楊偉雄唔搞創科可以搞乜，IT人話佢身家好厚，而且仲係紅酒專家，有次一班人同佢食飯，楊偉雄即場示範蒙瓶試酒，每支酒嘅酒莊、地區、年份全中，在場個個話佢做品酒師一定好過做創科局長，仲有IT人講笑，佢飲開靚酒，佢份人工可能只夠佢買幾箱紅酒，不如𠵱家全身投入搞紅酒生意，好過繼續為香港同國家投入力量搞創科。
李八方