今年1、2月開始，巿面一罩難求，家居照顧服務中心亦不例外。基督教家庭服務中心服務總監（長者照顧） 唐彩瑩指，疫情剛開始時其實對上門探訪不太擔心，最緊張反而是防疫物資短缺問題，「口罩基本上每一日服務都要用，就算唔係疫情，因為埋身照顧，保護裝備係好必要，我哋淨係七間中心，每個月都起碼用150盒，係盒喎，唔係個喎。」
她回憶，當時採購物資困難重重，每日望天打卦，「新年之後就冇人訂到，落咗貨嗰啲唔嚟啦，或者畀晒醫院，又可能訂100盒得20盒到，或者一睇咁薄嘅唔敢用……又可能例如越南嘅臨上機話唔俾出關。」
她笑言，最近大家學會不同國家語言的口罩單字，「搵到去秘魯、俄羅斯牌子都有；仲要搵酒精搓手液、消毒濕紙巾、漂白水，仲要check埋個中心係咪U形管，其實係非常辛苦。」幸好其後找到贊助資金，巿面防疫物品恢復供應，才慢慢放下心頭大石，「有啲口罩都派咗出去畀老人家，佢哋都安心啲，但係都唔敢畀太多，驚隔籬鄰舍走去笠咗佢。」
義工縫製布罩捐出
坊間漸漸多了巿民關注中心需要，「不時有人會嚟捐物資，可能私人幾盒幾盒都會好熱心拎過嚟捐。」中心社工張惠賢指，疫情期間若非緊急便不會家訪，會透過打電話記錄長者情況，視乎需要轉贈防疫包等物資，「𠵱家會盡量打多啲電話問佢哋個復康進度、有乜需要，老實講佢哋好多時都會問有冇口罩。」
唐姑娘指近來有媽媽級義工出手，捐助自己縫製的布口罩，「好似HK mask嗰啲，都想老人家有得應急，真係無口罩又好想出街買個菠蘿包食嘅時候，都唔會太無助。」
■記者黃翠儀