佔中三子之一的陳健民(KM)上月刑滿出獄,一直努力跟變了樣嘅世界connect,佢雖然繼續有寫文章,但鮮有接受訪問,更加唔好講再次三子同場,結果佢將出獄後嘅第一次三子同台受訪,獻出咗畀基督教網台「辛福台」嘅直播節目,噚晚同朱耀明牧師、戴耀廷教授,接受王少勇同陳恩明兩個牧師訪談,三子從信仰角度回應近日社會形勢,包括近日多個民主派領袖被捕,呢集題目仲相當挑機,叫「你咁樣係唔會令到我驚㗎!」,須知道呢句金句嚟自7.21元朗事件,而噚日正正就係21號。
三子噚晚傾得興起,節目亦反應踴躍超晒時,長期有過千人收看網上直播,唔少觀眾留言大讚節目討論氣氛高質。唔好以為三子聚首只會講和平抗爭,KM就講到當年德國潘霍華牧師參與刺殺希特拉,包括點樣拎住炸彈入去同希特拉開會,結果行動失敗,但當時換來希特拉同全國公告,自己係上帝揀選嘅領袖,仲得到當年德國教會附和,聽落絕對令人無比沮喪,但KM話反而令佢有所反省,知道點樣繼續行落去,仲話因為咁,令佢好鍾意睇聖經《傳道書》,知道所有嘢都有佢嘅時間。