被封「性女」嘅前港姐楊斯雅（Cindy）離開娛圈後，2017年同無綫藝訓班出身、原名陳宇翔嘅陳光耀（Samuel）擺酒，當時已有讀者爆料指男方早有老婆J小姐，但Samuel堅稱同J小姐早已分手；事隔多時，大婆J小姐近日向《蘋果》提供跟Samuel嘅結婚證書，直斥Cindy搶人老公！
家人包庇心死
原來Samuel喺2017年11月22日已先跟J小姐結婚，同年除夕卻公然與Cindy擺酒，J小姐接受《蘋果》訪問時毫不留情踢爆對方惡行，稱同Samuel拍拖十年後結婚，並育有一女，佢話：「囡囡就快兩歲，婚後佢搬咗嚟我度住，每星期full day留家三晚左右啦，成日都話返內地做嘢、拍嘢或返舖頭，返嚟一陣又走。」佢坦言一直知道Cindy嘅存在，對方亦曾透過短訊聯絡佢：「佢pm過我話好唔鍾意我，因為我同呢個男人一齊，我真係唔識點答，佢後來block咗我，未正式見過面。」J小姐表示起初還「隻眼開隻眼閉」，但後來發現原來Samuel家人一早知，並包庇佢一腳踏兩船，先令佢死心。
自稱已經簽紙
J小姐稱Samuel一直否認同Cindy一齊，對於被指背妻偷食，Samuel回覆：「邊個報料？係咪我前妻？」記者追問係咪同J小姐已離婚？佢話：「離咗啦，啱啱簽咗紙。」再追問離婚日期？佢不慎爆響口：「我唔記得實際日子，新年左右。我都要打畀佢同佢傾，我冇踏兩船。」
根據Samuel提供嘅時間線，即前年同Cindy一齊時，仍然係人夫身份。記者再致電向J小姐了解，佢話：「到呢刻我哋都未簽紙，律師話要分居半年。」被指搶人老公嘅Cindy就話：「我做緊嘢，你問番佢啦。」
撰文：馮仁昭