已故巨星「靚仔」份人出名硬頸，不過亦好有原則，從來唔鍾意佔人便宜。靚仔初出道時，真係有段難捱嘅日子，嗰陣佢喺電視台未係撈得好掂，人工仲少過一個兒童節目主持，雖然家底唔錯，但佢從來都唔會問屋企人攞錢，加上一早已搬出嚟住，更加唔想靠屋企，所以幾窮都好，佢都堅持租屋，不過當時喺廣播道嘅租金好貴，所以交租都用咗靚仔大半人工，平時惟有死慳死抵，有時食個包就當一餐。
後來得到前輩「圓碌碌」賞識，畀靚仔喺節目出吓鏡，增加知名度，圓碌碌又推薦佢為電視台唱咗好多主題曲，之後仲介紹佢簽唱片公司。圓碌碌嘅知己「女皇」亦好關照靚仔，女皇有外地登台都會預靚仔一份。
堅拒收歌酬
有次佢哋去東南亞登台，女皇講明薪酬一人一半，但係去到當地嘅前一晚，女皇突然發燒，靚仔見到對方咁辛苦，就提議取消演出，仲話最多賠錢。不過女皇為免得失主辦商堅持上台，靚仔見到女皇咁樣死頂，就幫對方唱多兩part，等女皇唔使咁辛苦。事後靚仔堅持唔肯收自己嗰一半酬勞，話係女皇搵命博嘅錢。自此，女皇同靚仔感情更深厚，後來靚仔紅咗，仍然飲水思源，每次開演唱會都會送飛畀女皇捧場。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。
