瑞典神鋒伊巴謙莫域球場內外不嬲霸氣十足，好多球迷都叫佢做「球壇呂布」，估唔到就連隊友一樣冇面畀。事關曾經同伊巴一齊效力美職聯球隊洛杉磯銀河嘅葡萄牙中場祖奧柏度馬查度，近日接受傳媒訪問時爆料，話伊巴輸咗一場關鍵波之後向隊友大發脾氣，甚至揚言要殺死佢哋。
先贏後輸更衣室爆seed
話說喺二○一八年美職聯常規賽最後一戰，主場嘅銀河喺半場領先兩球之下，下半場倒輸三粒畀侯斯頓戴拿模，搞到季後賽都冇得踢。祖奧柏度大爆伊巴賽後一返到更衣室，即刻向銀河隊友大發雷霆：「如果你哋嚟到呢支球隊，係想去海灘或者行吓荷李活，你哋可以去，但我戶口入面有三億美金，仲有個島，我根本同你哋嘅諗法唔同！你哋邊個第一個同我開口講嘢，我就會隊冧佢，我真係講得出做得到。」講完呢單，祖奧柏度又爆另一單，話說佢哋有一次訓練嗰陣要踢分隊賽，當時大家問邊個負責先開波，當時有助教話：「祖奧柏度啦，今日佢生日喎！」點知伊巴立即轉身話：「每日都係我生日，快啲將個波交畀我。」雖然伊巴之後笑騎騎，但從呢兩單嘢睇得出，佢似乎冇將呢位銀河隊長放喺眼內，可能覺得柏度同佢唔同level啩。事實上，伊巴以往喺球壇一向非常霸氣，唔理你係球會高層、領隊定係隊友，有咩唔滿意都一樣照鬧（見附表）。
返米蘭入多六粒夠晒數
最近武漢肺炎喺意大利肆虐，伊巴仲曾經喺網上號召民眾團結擊退疫情，揚言「病毒唔搵我，我都會去搵佢。」點知四月初伊巴就返到家鄉瑞典，仲喺當地球會哈馬比進行訓練，一度惹嚟佢會離開意甲嘅傳聞。不過意大利傳媒報道，伊巴落實禮拜四就會返到米蘭，為意甲重開做準備，報道甚至指出三十八歲嘅伊巴，今季目標係希望取得雙位數字嘅入球，意味今季幫AC米蘭射入四球嘅佢，餘下十二場聯賽仲要入多六粒，就可以連續十四年入球達雙位數字，做得到嘅話，呢項數據絕對係霸氣外露嘅表現！