香港政府早前推出「限聚令」及6項規管食肆等措施，禁止人群聚集希望減低武漢肺炎疫情，但不少圈中開店的藝人卻因生意大受打擊而叫苦連天。限聚令原定明日屆滿，昨日政府宣佈延長至下月7日，只放寬食肆不用只限坐一半。無綫前藝人陳潔玲開設兩間party room繼續停業，現每月蝕六位數，對於限聚令延長，她昨接受《蘋果》訪問時直斥：「都冇辦法，不嬲都係政府話點就點，到今日呢個地步我已無話可說，呢個政府反應永遠都慢十拍，靠政府不如靠自己救自己啦！」
而陳潔玲日前在觀塘受訪，坦言疫情對其生意做成大衝擊：「疫情開始時生意已經一路下跌，直到打邊爐家族事件發生後，生意係大跌九成甚至零生意。」提到政府早前公佈的兩輪千億救市抗疫基金，但party room業界卻不在支援和補助範圍行業內，陳潔玲直斥：「咁樣同逼我哋去死冇分別。」若繼續不能營業，隨時要執笠止蝕，她謂：「政府嘅政策唔該可唔可以周全同快少少？一日唔封關始終阻止唔到。」
鍾達茵推特價餐
曾參選港男的吳雲甫開健身中心，但早前已因疫情影響生意而結束，他昨日表示：「我覺得限聚令係必要，外地全部行業都停，咁就公平，但香港唔係全部停，咁就未必有效同公平。」陳庭欣男友楊振源在旺角開健身中心，任代言人的陳庭欣昨回覆傳媒時說：「佢哋覺得目前一齊抗疫係大前提，我就認為日前零感染，係一個大好消息。」雖然仍停業，但陳庭欣找來好友兼財經女神朱紀菲經營的消毒用品，為中心進行大消毒。
另外，吳啟明在上環的食肆自2月已暫停晚市，限聚令下只做午市及外賣，他日前表示：「真係完咗先考慮開唔開返晚市，一定要安全。」歌手鍾達茵（Pam）與友人在觀塘、旺角經營酒吧餐廳及日本料理餐廳，疫情下仍不裁員，她說：「餐廳坐滿都係得一半，營業時間又縮短，睇到都心悒，惟有推出一啲特價定食，總好過乜都唔做。」對於政府的千億救市基金，她說：「好多條件寫得唔清晰，坦白講都唔知點為之合資格，計算方法又唔太清楚，事實上就算攞晒所有資助都係要蝕錢。」
阿旦盼放寬營業
鄧洢玲（阿旦）和友人在銅鑼灣開設按摩店，之前已自發停業14日，前後合共停業28日，現在又要再停多14日，雖業主體諒減租，但每月仍蝕六位數字，她說：「生意額跌咗近九成，但唔會止蝕執笠，因為唔係我營運生意方針錯誤。」她希望政府對這些非傳統行業可以補貼租金，阿旦坦言：「唔好再停業，就算限制空間同人數冇所謂，起碼有生意做。」
戲院在過去兩星期停業，但內部仍有限度開工，主要是操作放映機，以保持正常運作。院商對解封重開充滿信心，戲院的小食部也會配合安排，暫只出售包裝食品。有戲院的小食部負責人抱怨政府慢半拍及臨急抱佛腳的作風：「等人有心理準備，開戲院你估開水喉話開就開。」
採訪：曹家誠、何永寧、陳杰、張明
攝影：仇志德、林賓尼、陳俊強